کلاسک گوجری شعراء

کلاسک گوجری شعراء
(گوجری ادب کی سنہری تاریخ از ڈاکٹر افیق انجم سے ماخوذ)

چوہدری مہر علی المعروف نونؔ پونچھی  (1850 - 1925پونچھ)

ج:

جان میری تیں کیوں ساڑ سٹی، ساڑو گھل مِنا کِت جائے گو توں

گِنوں روز تیرا جا کے بیس رہیو، منا دس جائیے کد آئے گو توں

اِتنا دکھاں جوگی نہیں تھی جان میری، کے خبر تھی کالجو کھائے گو توں

نونؔ نہ غلام نا سٹ جائیے، مر جاؤں گی تے پچھوتائے گو توں

ح:

حُکم تیرو گھر بار تیرومیری جان قُربان بسارئیے نہ

چیتو نہ بسارئیےجان گھولی، مرتا دم توڑی قولوں ہائیے نہ

جس کو سنگ کرئیے اسکے نال مرئیے دغو دے پردیس مانھ مارئیے نہ

نون سدے جے تِناں غلام تیری، مہیساں نال آئیے بھاویں چارئیے نہ

ق:

قید ہوئی غم کا پنجرہ مانھ، کی دُکھاں نے جان لاچار ایسوں

کھان پین بھُلو ہویو جین مُشکل، کِتے نہیں ملیو دلدار ایسوں

نہیں تھی خبر پریت مانھ وہیں دھوکھا، نہیں تے چھوڑ جاتی گھر بار ایسوں

نُونؔ زُلفاں کی گھل کمند گل مانھ مِنا مر گیو سِر کے بھار ایسوں

سائیں قادر بخش   (1858پونچھ - 1938راجوری)

الف:

اسو بے ترس نہ کوئے ڈِٹھو جِسو توں ڈھولا میرے نال ہوؤ

سڑ بل  گئی سینوں ساڑ سٹیو، سارو پُچھے یوہ کے حال ہوؤ

بھلا کے دسوں کہڑو روگ مِنا اندر بھکھ پھُرنو رتو لال ہوؤ

قادرؔ یار اکوار توں گھل پھیرو، دیکھ درد میرو کِس تال ہوؤ

الف:

اُڈ کاگا میرو یار آوے، بنڈے دُکھ کرے پُچھ بھال مِناں

ڈاہڈی ہوں ڈولی، مر بولی، ڈِٹھا باجھ ہے جین محال مِناں

رات سوؤں تے خاب خیال آوے، دِنیں دُکھ لاویں چھاتی نال مِناں

قادرؔ یار باجھوں کھان پین بُھلو،  اینگا آ ڈھولا دے جمال مِناں

ب:

بُری سمجھے سارو لوک مِنا، تیرا عشق نے کی بدنام ڈھولا

ٹھٹھا کریں تے ہسیں یہ لوک سارا گوہنڈی کہیں تِنا سر سام ڈھولا

پُچھے لوک ہوئی تِنا دخل تِتوں رون پیش آیو صبح شام ڈھولا

قادرؔ یار کارن میرا نین روئیں آوے صبر نہ مُول آرام ڈھولا

ت:

تتی روئے تیرے باجھ اِنگا چلیو کِت توں چھوڑ اس جا مِناں

پُھوک تاپ چڑھیو، دیکھ بانہہ میری، نبض دیکھ تے دے دوا مِناں

تیرا سنگ کو ڈاہڈوارمان جانی، اڑیا نہ جائیے دُکھ لا مِناں

قادرؔ یار ہے نال پریت تیرے، کہوں جھوٹھ تے جانے خُدا مِناں

اک رات شیر گے نال، کتاب: اسلامی کہانی، مصنف: پروفیسر خالد پرویز، گوجری ترجمو: محمد سلیم گجر کولی

محمد سلیم گجر کولی، گوجری مترجم

اک رات شیر گے نال

اک مسافر گی کہانی سنا جہڑو کہلو ہے ۔موسم ٹھنڈو ہے رات گو گُپ اندھیرو ہے تے جنگل گو راہ ہے وہ لگا تار چل رہیو ہے۔چلن نال اُس گو جسم تے گرم ہے ور ٹھنڈ اتنی ہے کہ جسم مانہہ اُس گو خون جما دے۔ اسے حالت مانہہ وہ یو فیصلو کرے کہ آخر ہوں کسے غار مانہہ پناہ لے لیوں۔  وہ کجھ قدم ہی اگے چلیو تھو کہ اُس نا اک غار دسی وہ خوش ہویو کہ رات آرام نال گزرے گی۔

وہ مسافر اس غار مانہہ داخل ہوگیو۔ اس غار مانہہ چمکتی بجلی گو لو نال اُس نا غار مانہہ ہر چیز صاف نظر آوئے۔اُس نے اک پتھر چایو تے اُس نا کند گے نال رکھ گے اُس ور سر رکھ گے لیٹ گیو کہ تھوڑی دیر آرام کر لیوں۔

ہون وہ لیٹیو تھو کہ اک خونخوار شیر غار مانہہ آجاوئے تے مسافر نا دیکھ گے اُس کولوں پوچھے۔

میاں میری اجازت تیں بغیر تناں میرا کہر مانہہ کس نے داخل ہون دیتو۔  توں کتوں آﺅ تے کس ارادہ نال آؤ۔ مسافر اُس خونخوار شیر نا دیکھ گے بولیو کہ؛

ہوں رب تعالیٰ گی راہ گو مسافر ہاں۔ ٹھنڈ گی وجہ تیں پریشان ہاں۔اس واسطے اج گی رات ہوں تھارو مہمان ہاں جد کہ تم میرا میزبان ہیں۔ شیر مسافر گی اس گل ور مسکرایو تے کہیو کہ۔

مناں رب تعالیٰ گی راہ گا مہمان بناتاواں خوشی ہو رہی ہے۔  اگر توں رب تعالیٰ گی راہ گو مسافر نہ ہوتو تے تیرا جیسا بن بلایا مہمان گو جہڑو حشر ہوں کرتو وہ ہوں بیان نہیں کر سکتو۔اج گی رات تناں میرا نال رہن گو اجازت ہے۔

شیر گی اجازت تے رضامندی نال وہ مسافر ساری رات اُس غار مانہہ گزارے اسرا کہ وہ ہر ویلے قرآن مجید گی تلاوت کرتو رہے اِت تک کہ صبح گی نماز گو ویلو ہو جاوے۔نماز پڑھن تیں بعد مسافر فر سفر شروع کرن گی تیاری کرے تے خونخوار شیر اُس نا صرف اتنو کہہ۔

اے مسافر توں یو خیال نہ کرئیے کہ مناں انساناں گو ماس چنگو نہیں لگتو ۔ میں تناں اپنو مہمان بنا گے صرف اس واسطے چھوڑ دیتو کہ توں اللہ گی راہ مانہہ نکلیو ہے ۔ خدا گی قسم ہوں ترے تہڑاں گو بھوکو ہاں۔

خدا گی راہ مانہہ یعنی حج بیت اللہ گا سفر ور نکلن آلو حضرت ابراہیم ادھمؒ رب کائنات گے حضور شکر گزار ہویں جہڑو ہر چیز گو مالک تے خالق ہے۔ اسرا حضرت ابراہیم ادھمؒ حج بیت اللہ گا فریضہ تیں بعد خیر و عافیت کہر واپس پہنچ جایئں۔ سچی گل یا ہے کہ جہڑا لوک خلوص نیت نال اللہ گی راہ مانہہ نکل جاویں رب قادر و قدیر اُنہاں گی حفاظت فرماوے۔  تے وہ آدمی جن و بشر تے ہر شر تیں محفوظ رہے۔

کتاب: اسلامی کہانی،  مصنف: پروفیسر خالد پرویز،  گوجری ترجمو: محمد سلیم گجر کولی

جیڑیں باؤلی پر بھریں رل کے سنگن، وے گاگر، گھڑا تے گھڑولیں ہیں سوہنیں، منیر احمد زاہد، گوجری شاعر

منیر احمد زاہد، گوجری شاعر

جیڑیں   باؤلی   پر   بھریں  رل کے سنگن

وے  گاگر، گھڑا تے گھڑولیں  ہیں سوہنیں

کریں    اکھ   مٹکو   یہ     مٹکا   سراں پر

کے سنگناں تے سکیاں کی ٹولیں ہیں سوہنیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عجب  دلربا ہے  یا جھانجھر  کی چھن چھن

 یہ  پیریں تیرے پول، پولیں ہیں سوہنیں 

منیر احمد زاہد

اتھروں، سُتا درد جگاویں اتھروں دل گا راز کُھلاویں اتھروں، حق نواز چوہدری، گوجری شاعر

حق نواز چوہدری، گوجری شاعر

اتھروں

سُتا  درد  جگاویں  اتھروں

دل گا راز کُھلاویں اتھروں

پہلاں دل توں رَت  نچوڑیں

فِر اَکھاں توں آویں اتھروں

موتی بَن گے ڈُلّیں  اکھ توں

قیمت  آپ  لواویں  اتھروں

اکھ تھکیں جد راہ نا تکتاں

ساوَن مُچ فِر لاویں اتھروں

رہؤں ہجر  ما  کُڑھتو  روتو

جَدتُو آئے، ہنساویں اتھروں

پہاویں  کتنو   پاپی   بندو

رب کولوں بخشاویں اتھروں

رَو  رَو   مَنگ   مقدّر  بدلیں

اندر  باہر چمکاویں  اتھروں

دل گی باڑی بنجر  ہو جائے

مُڑ   نواز  بساویں  اتھروں

حق نواز چوہدری

آغاز وچ، کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ابرار حسین گوجر، گوجری مترجم

آغاز وچ

جدید صنعتی دنیا غی اک اصطلاح ہے جسناں کنجی گھماؤ منصوبو (Turn Key Project) کہیو جائے۔ اس تیں مراد ایسو مکمل بنیو بنایو گھر یا کارخانو ہے جس وچ آدمی غو کم صرف کنجی گمانڑوں وے۔ مسلمانڑں موجودہ زمانڑاں وچ جس طرح عمل کر یں انہاں ناں دیخ غے لگے کہ شاید ایہہ  دنیا ناں اپنڑیں واسطے اِسے قسم غی جاء سمجھیں۔ مسلمانڑاں غو خیال یو ہے کہ خدا نیں تیار شدہ  دنیا  انہاں  غے حوالے کر شوڑی ہےہونڑں اِے  کنجی گھما غے اِسناں اپنڑیں مرضی غے مطابق چلا سکیں۔

پر یا سراسر ناسمجھی ہے۔ حقیقت یا ہے کہ دنیا عمل تے مسابقت غی دنیا ہے۔ اِت ہوؤناں شروع تیں آخر تک سارو کم خود کرنوں پے غو۔ ہوؤناں لوکاں نال مقابلو کر غے اگے بدنوں وے غو۔ اس تیں بعد ہی یا گل ہو سکے کہ ہوؤں اسباب غی اس دنیا وچ اپنڑوں مقام حاصل کر سکاں۔

اِس ویلے مسلماناں ناں جیہڑی چیز سمجھیا غی لوڑ ہے واہ یا حقیقت ہے کہ اُو تاریخ غا شروع وچ ہیں ناں کہ آخیر وچ۔ ہر جنڑوں جانڑے کہ جے کدے اُو  جنوری1985 وچ ہے تے اسناں دسمبر 1985 تک پہنچیا واسطے باراں مہیناں انتظار کرنوں پے غو۔ زمین اپنڑاں  محور اوپر 360 وار چکر لائے تاں جا غے ممکن وے غو کہ مہارو اک سال پورو وےتے جا غے  ہوؤں سال غا آخیر وچ پہچاں غا۔

یا اِس دنیا غی معلوم حقیقت ہے۔ پر اِسے معلوم حقیقت ناں مسلمان ملت غی تعمیر کرتاں پُہل یاہیں۔ اُو  وہیں پہلا مہیناں وچ تے چاہیں کہ چھال مار غے آخری مہیناں وچ پہنچ  یاں۔ اُو بنیاد غی تعمیر در توجو نیں دیتا پر چاہیں کہ اپنڑاں خیالی گھر غی چھت اوپرجاء  کھلاں۔  اُو واقعہ غا حساب نال سفر غا شروع وچ وہیں پر نعرہ ایہہ جیہا ماریں کہ درمیانڑوں پینڈو طے کر غے آخری منزل اوپر پہنچ غیا ہیں۔

یاد رکھو! مہارو سب تیں پہلیوں یو کم ہے کہ ہوؤں اک بامقصد قوم تیار کراں۔ ہوؤناں قوم غا لوکاں ناں واہ تعلیم دینڑیں ہے جس نال اُو اپنڑوں ماضی تے حال جانڑں سکیں۔ انہاں غے اندر اُو شعور بیدار کرنوں  ہےکہ اُو اختلافات تیں باوجود اک ہو غے رہیں۔ انہاں غے اندر اُو حوصلو پیدا کرنوں ہے کہ اُو شخصی تے وقتی جذبات تیں اوپر ہو غے قربانی دیں سکیں۔ جیہلے ایہہ سارا کم ہو چکا ویں فیر ہی ہوؤں کوئی ایسو قدم چاء سکاں جیہڑو مہارے واسطے کوئی نویں تاریخ پیدا کریا آلو وے۔ اس تیں پہلیوں کوئی قدم چانڑوں موت غا کنواں وچ چھال مارنوں ہے نہ کہ زندگی غا باغ وچ داخل ہونڑوں۔

کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ہوں پڑھ غے پڑھاؤں غو، کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ابرار حسین گوجر، گوجری مترجم

ہوں پڑھ غے پڑھاؤں غو

فادر ہنری ہراس (1889- 1956) اک سپینی مسیحی تھا۔ اُو 24 سال غی عمر وچ 18 نومبر 1922 ناں بمبئی غا ساحل اوپر لتھا۔ ہندستان غی زمین نیں انہاں ناں بہت متاثر کیو۔ انہاں ناں محسوس ہواؤ کہ انہاں غا تبلیغی کم واسطے اس ملک غا حالات زیادہ سازگار ہیں۔ انہیں یا گل پلے بن لی کہ اُو اِتے رہ غے اپنڑوں تبلیغی کم کریں غا۔  پر ہندستان انہاں غو وطن نتھو، کم تیں پہلیوں یا گل ضروری تھی کہ انہاں واسطے اِت کوئی رہیا غو بندوبست وے۔ اِت اپنڑیں جا بنا غے ہی اُو اپنڑیں تبلیغ کر سکیں تھا۔ انہیں طے  کیو کہ اُو ہندستان وچ بطور معلم رہیں غا تے اس تیں بعد کالج وچ تے کالج تیں باہر اپنڑوں تبلیغی کم کریں غا۔ بمبئی غو ہر انسٹیٹوٹ انہاں غی یادگار ہے۔

فادر ہنری ہراس (Fr. Henry Heras) تھوڑاں تہاڑاں بعد سینٹ زیویرس کالج غا پرنسپل نال ملیاء۔ اُو اک تاریخ دان تھا انہیں اپنڑاں ملک تیں تاریخ وچ ڈگری لی تھی۔ پرنسپل نیں انہاں غا کاغذ دیخ غے پُچھیو؟ "توؤں اِے کیہڑی تاریخ پڑھانڑؤں پسند کرو غا" فادر ہراس نیں فوراً جواب دتو "ہندستانی تاریخ" پرنسپل غو اغلو سوال تھو: ہندستانی تاریخ وچ تھارو مطالعو کتنوں ہے؟ انہیں کہیو"کوئی نیں"۔

"فیر توؤں ہندستانی تاریخ کس طرح پڑھاؤ غا" پرنسپل نیں پُچھیو۔

فادر ہراس غو جواب تھو : I shall study it.

ہوں ہندستانی تاریخ پڑھ غے اپنڑیں تیاری کروں غو، فیر اسناں پڑھاؤں غو

فادر ہراس جانڑیں تھا کہ معلمی غو کم اُو بطور پیشو نیں اختیار کر رہیا کہ یورپ غی تاریخ یا جو وی مضمون اُو چاہیں پڑھائیں تے مہینہ غا آخر اوپر تنخواہ لے غے مطمئن ہو یاہیں۔ انہاں واسطے معلمی غو کم اک خاص مقصد واسطے تھو۔اُو خاص مقصد تھو انہاں غو تبلیغی کم تے اس واسطے مناسب بنڑیاد   بنانڑوں۔ اس کم واسطے انہاں واسطے ہندستانی تاریخ ہی سب تیں موزوں مضمون تھو۔ اُو ہندستان وچ تھا اس واسطے اُو ہندستانی تاریخ غا استاد بنڑں غے اِت غا نوجواناں وچ بہتر طریقہ نال تبلیغ کر سکیں تھا۔ یاہی وجہ تھی کہ ہندستان غی تاریخ تیں ناآشنا ہویا غے باوجود انہیں ہنستانی تاریخ پڑھانڑیں پسند کی۔

انہیں ہندستانی تاریخ غا مطالعہ وچ اتنی زیادے محنت کی کہ اُو نہ صرف اس مضمون غا اچھا معلم ہو غیا بلکہ ہندستانی تاریخ وچ  انہاں ناں سر جدوناتھ سرکار تے ڈاکٹر سریندر ناتھ سین غا درجہ غا مورخ غی حیثیت لبھ غئی۔

کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ناموافق حالات، کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ابرار حسین گوجر، گوجری مترجم

ناموافق حالات

سر والٹر اسکاٹ (1771-1832) غو شمار انگریزی ادب غا نامور افراد وچ وے۔ پر اسناں یو رُتبو اس غی معمولی حیثیت  غی وجہ تیں لبھو ہے۔ اس غی معمولی حیثیت اس واسطے واہ سیڑھی بنڑں غئی کہ جس اوپر چڑھ غے اُو کمال تک پہنچ غیو۔

سر والٹر اسکاٹ اپنڑیں پکی عمر تک  اک معمولی صلاحیت غو آدمی سمجھو جائے تھو۔ اس غی حیثیت اک ترییاء (تیسرا)  درجہ غا شاعر جتنی تھی۔ فیر یو ہوا ؤ کہ اس اوپربہت قرضو چڑھ غیو۔ اس ناں شاعری تیں اتنی آمدنی نتھی وے کہ اُو اپنڑوں قرضو چُکا سکے آ۔ نتیجو اس غا حالات بہت خراب ہو غیا۔ خراب حالات نیں اسناں جھنجھوڑ شوڑیو۔  اس غو  نتیجو یو ہوا ؤکہ  والٹر اسکاٹ غے اندروں اک نواؤں انسان ابھریو۔ اس غا ذہن نیں کم کریا غا نواں موقع لوڑ لیا۔

ہونڑں اس نیں نویں نویں کتاوؤ پڑھیں۔ اس مطالعہ تیں اس ناں محبت غیں تاریخی کہانڑیں لخیا غو خیال آیو۔ یاء سوچ آتاں ہی اس نیں محبت غی تاریخی داستاناں ناں ناول غا انداز وچ لخڑوں شروع کر دتو۔

قرض غی ادائیگی غا جذبہ نیں  اسناں اس سلسلہ وچ خوب محنت کریا اوپر مجبور کیو۔ اس  نیں کئی سالاں تک اس مقصد واسطے دیہاڑ رات اک کی، کیوں جے اس نیں بازار وچ اپنڑیں کہانڑیں چنگاں پیساں وچ بیچنی تھیں تے یاء گل اسے ویلے ہو سکے تھی تانجے  اس غیں کہانڑیں اتنیں جاندار ہوتیں کہ پڑھیا آلاں غی توجو اپنڑیں پاسے چِھک سکیں ۔  یاہی گل ہوئی کہ والٹر اسکاٹ غی غیر معمولی محنت اس غی کہانڑیاں غی کامیابی غی ضامن ہو غئی۔ اس غیں لخیں  ویں کہانڑیں اتنیں زیادے  بِکیں کہ اس غو سارو قرضو لے غیو۔ والٹر اسکاٹ غے اوپر یو مشکل ویلو نہ آتو تے اس غے اندر یاء صلاحیت کدے پیدا ناں ہوتی ۔ اس بیدار ہویا آلی صلاحیت نیں اس کولوں اُو کہانڑیں لخوائیں کہ جنہاں غی وجہ تیں اسناں  انگریزی ادب  وچ اُچو مقام لبھو۔

اس تیں بعد والٹر اسکاٹ ناں سر غا خطاب تیں نوازیو گیو۔ والٹر اسکاٹ واسطے قرضو زندگی موت غو مسئلو تھو پر جے کدے یو مسئلو نہ ہوتو تے والٹر اسکاٹ سر والٹر اسکاٹ کدے ناں بنڑتو۔

کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

خاب وچ، کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ابرار حسین گوجر، گوجری مترجم

خاب وچ

مسٹر رام رتن کپلا ریفریجریٹر تے ائرکنڈیشنر غو کاروبار کریں۔ انہاں غی فرم غو ناں کیپسن ہے۔ نئی دہلی وچ آصف علی روڈ اوپر اس غو صدر دفتر ہے۔

مسٹر رام رتن کپلا ناں اپنڑاں دفتر واسطے اک سلوگن غی لوڑ تھی۔ انہیں اخبار وچ اعلان کیو کہ جیہڑو آدمی تھوڑاں لفظاں وچ اک چھنگو سلوگن بنڑا دئیے غو اسناں معقول انعام دتو جائے غو۔ بار بار غا اعلان غے باوجود کوئی ایسو بندو نیں لبھو جیہڑو انہاں ناں چنگو سلوگن دے سکے۔ چند اک لوکیں کوئی فقرہ مسٹر کپلا ناں لخ غے دتاء پر انہاں ناں اُو پسند نیں آیا۔ "سلوگن Penetrating ہونڑوں چاہی غو ہے۔  پر اُو سلوگن Penetrating نِتھا" انہیں یاء گل 4 دسمبر 1983 وچ اک ملاقات غے دوران کہی۔

مسٹر کپلا ہور دن رات اِسے ادھیڑ بَن مانھ لگا رہیا۔  اُو مسلسل اِس بارا وچ سوچتا رہیا۔ انہاں غو دماغ ہر ویلے سلوگن غی تلاش وچ ہی تھو پر کامیابی انہاں کولوں دور تھی۔

اِسے سوچ وچ چھ سال لنگ غیا۔ فر یو ہواؤ کہ مسٹر کپلا نے اک روز خاب ڈیٹھو ، خواب وچ انہیں ڈیٹھو  کہ اُو اک باغ وچ ہیں۔ بہت سوہنڑوں موسم ہے۔ رنگ برنگی چڑیں بوٹاں اوپر چہچہائیں۔ یو موسم دیخ غے اُو بہت خوش ہوا،  انہاں غا منہ تیں خود بخود نکلیو:

"ویدر (weather) وے تے اے جیہو"

یاء گل کہتاں ہی انہاں غی اکھ کھل غئی۔ اچانک ہی انہاں ناں پتو لگو کہ انہیں اُو سلوگن لوڑ لیو ہے جس غی انہیں  لوڑ  سال ہا سال کی تھی۔ نال ہی انہاں غا دماغ وچ انگریزی غو یو جملو بنڑ ں غیو۔

KAPSON: the weather masters

خاب  انسان غا دماغ غی واہ سرگرمی ہے جسناں نیند غی حالت وچ اُو جاری رکھے۔ جے کدے تووں ذہن ناں سارو تہاڑو کسے اک پاسے مشغول رکھو غا تے رات ویلے واہی چیز خاب وچ تھارے سامنڑیں وے غی۔ تاریخ غیں بہت ساریں ایجاد خاب غے ذریعے ہوئی ہیں۔ اس غی وجہ یا ہے کہ موجد اپنڑیں ایجاد وچ اتنو کھبو وُہ وے کہ اُو سُتاں واں وی اُسے تیں متعلق  خاب دیخے۔ خاب اصل وچ کسے چیز نال انتہائی ذہنی   وابستگی غو ناں ہے۔ اے جئیا آدمی غا عمل غی مدت 12 گھنٹاں غے بجائے 24 گھنٹہ ہو یائے۔ یوہی کسے مقصد وچ کامیاب ہویا غو راز ہے۔ اس قسم غی گہری وابستگی تیں بغیر کوئی بڑو کم نیں کیو جا سکتو۔ نہ دنیا غو نہ آخرت غو۔

کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

سارو خون، کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ابرار حسین گوجر، گوجری مترجم

سارو خون

 پروفیسر پال ڈیراک  (Paul Dirac)  1902 غے وچ پیدا ہواء ۔ اکتوبر 1974 وچ 82 سال غی عمر گزار غے فلوریڈا وچ فوت ہواء۔  اُو نواں دور وچ نیوٹن تے آئن سٹائن تیں بعد سب تیں زیادہ نمایاں سائنسدان سمجھیا جائیں۔ انہاں ناں نوبل انعام سمیت ہور بہت سارا اعزاز لبھا ایں۔

پال ڈیراک غا ناں تیں کوانٹم میکانیکل تھیوری منسوب ہے۔ یو سائنسی نظریو ایٹم غا انتہائی چھوٹا ذراں تیں متعلق  بحث کرے۔ انہیں سب تیں پہلیوں اینٹی میٹر غی پیشنگوئی کی جیہڑی بعد غی تحقیق تیں سچ ثابت ہوئی۔ اس واسطے گارڈین (4 نومبر، 1984) نیں پال ڈیراک اوپر اک مضمون شائع کیو جس غی سرخی انہاں لفظان اوپر مشتمل تھی۔

Profit of the Anti-Universe

پال ڈیراک نیں ایٹم وچ پہلو اینٹی پارٹیکل دریافت کیو جسناں پازیٹران  (Positron) کہیو جائے۔  اس دریافت نیں نیو کلیر فزکس وچ انقلاب برپا کر شوڑیو ہے۔  لوگ جیلے انہاں کولوں پُچھیں کہ تووں تحت ایٹم مادہ غی نوعیت غا بارا وچ اپنڑوں چونکا دِتا آلو نظریو کس طرح لوڑیو ہے تے اُو دسیں کہ اُو اپنڑاں مطالعہ غا کمرہ غا فرش اوپر اس طرح لیٹ یائیں تھا کہ انہاں غا پیر اُپھراں وہیں تھا تانجے خون انہاں غا دماغ آلے پاسے دوڑے۔

When people asked him how he got his starting ideas about the nature of sub-atomic matter, he would patiently explain that he did so lying on his floor with his feet up so that the blood ran to his head.

بظاہر تے یو لطیفو ہے پر حقیقت یاء ہے کہ کوئی وی بڑو فکری کم اُوہی  بندو کر سکے  جیہڑو اپنڑاں سارا جسم غو خون اپنڑاں دماغ وچ  جمع کر لئیے۔

بوؤں ساراں لوکاں غو یو حال ہے کہ اُو اپنڑیں قوت کھلیار رکھیں۔ اُو اپنڑاں آپ ناں اک نقطہ اوپر یکسو نیں کرتا۔ اسے واسطے اُو ادھوری زندگی گزار غے دنیا تیں رُخصت ہو یائیں۔ ہر کم آدمی کولوں اس غئ پوری قوت منگےتے کامیاب اُوئی بندو وے جیہڑو اپنڑیں پوری قوت اپنڑاں مقصد اُوپر لا شوڑے۔

کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر