گوجری لوک ادب، چوہدری رفیق شاہد

چوہدری رفیق شاہد

گوجری لوک ادب

چوہدری رفیق شاہد

کِسے وی زبان کی وسعت تے عالمگیریت کو اندازو لان واسطے اُس زبان کا لوک ادب کو جائزو لینو ضروری وے جس زبان کو لوک ادب جتنو وسیع وے گو اُس زبان کی وسعت عالمگیریت تے تاریخی پس منظر وی اُتنا ہی مضبوط تے باٹا ویں گا۔ ہم جد گوجری زبان کا لوک ادب کو مطالعو کراں تے محسوس وے جے یاہ زبان اپنا قد کاٹھ وسعت جامعیت تے تاریخی اعتبار نال بر صغیر کی باقی تمام زباناں توں اگے ہے تے اِس زبان کو سِروکھرو تلاش کرن یا اِس کی نیں کا بارہ ماں پتو کرن واسطے کافی تگ و دو کی لوڑ ہے ۔ گوجری زبان کو لوک ادب وی کافی وسیع ہے جس ماں لوک گیت، لوک کہانیں، محاورہ ، اکھان، بجھارت، کہہ مُکرنیں، تے وہ سارووسیع مواد موجود ہے جس کا بل بوتا ور اس کی قدامت تے وسعت کو بخوبی اندازو لایو جا سکے۔

گوجری لوک شاعری

لوک شاعری کسے وی قوم کی سانجھی میراث ہے۔ یاہ ایک ایسی میراث ہے جس کا سارا دعویدار ہیں۔ ایک ایسی تخلیق جہڑی کِسے ایک فرد کا ناں: نال منسوب نیں پر اُس لسانی گروہ کو ہر فرد اُس کو وارث منیو جائے۔ ایک لوک گیت کا تخلیق کرن، گھڑن تے سنوارن ماں:کِتناں لوکاں کو عمل دخل ہے اس بارہ ماں:کُجھ نیں کہیو جا سکتو ، اِسے واسطے یوہ انمول خزانو اُس لسانی طبقہ کو سانجھو اثاثو مَنیو جائے ۔ لوک گیتاں کی تخلیق آپسی سانجھ نال کی جائے شاید تاں ہی یاہ اِتنی مقبول تے عام قبولیت کا سانچہ ماں:ڈھلی وی وے جے یاہ صدیاں تک سینہ بہ سینہ تے نسل در نسل منتقل ہوتی رِہ اور موجودہ نسل تک اس کا پُہچن کو یوہ ہی واحد سبب ہے۔ لیکن آئندہ نسلاں توں اِس کی زیادہ توقع نیں کی جا سکتی۔ اِس واسطے مروّجہ تعلیمی ڈھانچو ، نصاب انگلش میڈیم سکول، ٹیلی ویژن تے ریڈیو پروگرام اور کمپیوٹر کو سِر چڑھ کے بولن آلو جادو ٹیلی فون تے آمد ورفت کو نظام قطعاًاَج کا بچہ ناں:اِس گل کی اجازت نیں دیتو کہ وہ لوک واراں، لوک گیتاں تے لوک کہانیاں ناں سُن کے آتی نسل تک اُس ناں یاد رکھے تانجے اس امانت ناں وہ دوجاں کے حوالے کر سکے۔

لہذا موقعہ کی نزاکت ناں دیکھتاں اِس قومی سرمایہ ناں محفوظ کرن کی لوڑ محسوس کی گئی ، اسی ضرورت کے پیش نظر گوجری لینگویج اینڈ کلچرل ٹرسٹ کے زیر اہتمام چھپن آلا ادبی میگزین گوجری ادب ماں گوجری لوک ادب یا قدیم گوجری ادب چھاپن کو سلسلو شروع کیو گیو ہے۔گوجری ادب کا قاریاں ناں گزارش ہے جے کدے تھارے آہنڈ گماہنڈ کُجھ ایسا گوجری لوک گیت موجود ہیں تے اُنھاں ناں لکھ کے یا ریکارڈ کر کے مھارے حوالے کرو ۔ یوہ ادارو اپنا سہ ماہی رسالہ ضرور چھاپے گو تاں جے تھارو تے مھارو قومی سرمایو صدیاں تک آتی نسلاں واسطے محفوظ ہو جائے ۔ امیدکراں جے تم اپنا سُجھاؤ تے قلمی تعاون نال ادارہ ناں نوازتا رہیں گا۔پیش ہیں لوک گیتاں کا کُجھ نمونہ۔

مُندری

مُندری میری چمکے جی

مُندری میری بانکی ہے

مُندری میری سُوہنی لگے

مُندری میری سُونا کی

مُندری میری بانکی ہے

ہے امڑی کی نشانی

ہے بابل کی نشانی

ہے بیر کی نشانی

ہے سُہرا کی نشانی

ہے سَسُّو کی نشانی

قینچی

گھنیا درختا تیری اُچی ہے ڈالی ۔ایک ہے وچھوڑو دُجے رات ہے کالی

لگی قینچی دلاں کی

گھنو ہے درخت تے چوٹی بولے کاگ۔ سینے لائیں زخم کالجے لایو داغ

لگی قینچی دلاں کی

گھنو ہے درخت تے بڑی بڑی چھاں ۔ مُنشی کی چٹھی آئی بِچ بولے میرو ناں

لگی قینچی دلاں کی

گھنو ہے درخت تے لمّو لمّو گھیرو۔ اج میرا منشی کو اُٹھ گیو ہے ڈیرو

لگی قینچی دلاں کی

گھنو ہے درخت تے اُچی ہے چوٹی ۔ منشی نیں مُڑیو تے قسمت میری کھوٹی

لگی قینچی دلاں کی

اُچیا درختا تیرو کیسو ہے گھیرو

اُچیا درختا تیرو کیسو ہے گھیرو

اُچیا درختا تیرو سُوہج ہے سُوہنو

اُچیا درختا سُوہنا تیرا پَتر

اُچیا درختا تیری سُوہنی ہے چھاں

اُچیا درختا تیری سُوہنی ہے چوٹی

تیریاں ڈالیاں ور پنچھی کو ڈیرو

تیریاں ڈالیاں ور چِڑیاں کو رولو

کد توڑی ملیں گا میرا ربا مِتر

ماہی کی چِٹھی آئی وچہ بولے میرو ناں

ماہی خاطر دل ناں تسلی دئیوں جھوٹی

ٹپا

پانی کسیاں کو رُکتو نیں

کم چنگو کدے مُکتو نیں

پانی کسیاں کو جاری ہے

ہُن تیری باری ہے

پانی کسیاں کو بگھ رہیو ہے

ہس مِناں سارو جگ رہیو ہے

پانی کسیاں کو جاری ہے

یاد تِناں کر رہی ہاں

پانی کسیاں کو پی لینو

توں دس ناں کے دینو

پانی کسیاں بھر لیؤں

دُکھڑا ہوں جَر لیؤں

اللہ اللہ کر سجنا

اَج تک ہوں جَریو

دیکھ کے حالت میری

رات دھیاڑی ہوں

مِناں پردیسیاں تے

تیریاں جدائیاں کا

لوک کہانیں

لوک ادب کِسے بھی قوم کی میراث وے مھارا لوک ادب ماں لوک گیت ، لوک کہانیں وے ساریں صنف موجود ہیں جہڑیں کِسے بھی زبان کی وسعت تے بلند معیارکی عکاسی کریں۔اپنی اس میراث ناں سنبھال کے رکھنو مھارو ساراں کو فرض ہے تاں جے آن آلا وقت ماں ہم اپنی پہچان ناںقائم رکھ سکاں۔تاں جے مھاراں بڑاں بڈیراں کاقدماں نشان باقی رِہ سکیں۔تے زمانہ کا جھکھڑ تے جھولا مھارا قدیم ادب کی بنیاداں ناں ہلا نہ سکیں۔ ویسے بھی اج محنت تے سنجیدگی نال کم کرن کو زمانو نیں رہیو کیوں جے اس مشینی دور ماں مشیناں پر بھروسو کر کے دُوجاں کی تقدیراں کا فیصلہ لیا جائیں۔ اج کا دور ماں ہر فیصلو کمپیوٹر کے ذریعے کیو جائے تے آن آلا وقت ماں کِدے انسانی دماغ اِس نقلی دماغ کو محتاج نہ ہو جائے۔ اُس صورت ماں کائے چیز اگر لکھ پڑھ کے محفوظ کر لی تاں ہی آن آلی قوم اپنا ماضی کا بارہ ماں جان سکے گی ورنہ زبانی یاد کرن تے سینہ بہ سینہ کِسے بھی چیز کو اک نسل توں دوجی نسل توڑی منتقل ہون کو سلسلو ختم ہوتو جارہیو ہے۔ویسے بھی لوک ادب زندگی کا تمام پہلواں ناں اپنا گھیرا ماں لیتاں غیر محسوس طریقہ نال زمانہ کے نال نال اگے بدھتو رِہ۔مھارے تک پُہچن آلو لوک ادب نسل در نسل تے سینہ بہ سینہ منتقل ہوتو رہیو پر ہُن اِس کا مِٹ جان یا ضائع ہو جان کا بے حد خدشات ہیں اس واسطے ضروری ہے جے اس ناں تحریری صورت ماں محفوظ کر لیو جائے تاں جے ماضی تے مستقبل کو آپسی تعلق بحال رِہ سکے۔گوجری ادب نے اسے گل کو خیال رکھتاں اپنا باپ دادا کی میراث گوجری لوک ادب جس ماں لوک گیت، لوک کہانیں، اکھان، محاورات تے دوجی صنفاں ناں چھاپے چاہڑھ کے محفوظ کرن کو سلسلو شروع کر دِتو ہے ۔ پیشِ خدمت ہیں مختصر لوک گوجری کہانیاں کا اک دو نمونہ۔

بادشاہ کو پُوت

کِسے زمانہ ماں کوئے بادشاہ تھو اُس کی اولاد نیں وے تھی ۔ مختصر وہ اک کامل فقیر کولے گیو تے فقیر نے اللہ کولوں منگ کے کُجھ پُھوک پھاک کی تے اللہ نے اُس بادشاہ ناں پُوت دے چھوڑیو۔ پُوت بڑی ہی سُوہنی تے چنگی شکل آلو تھو ۔ ایسی سُوہنی شکل اللہ نے اُس ناں دِتی تھی جے دنیا دیکھ کے اُس پر عاشق ہو جائے تھی ۔ جد وہ جوان ہویو تے دوروں دوروں بڑاں بڑاں لوکاں کیں طرفوں پیش کش ہون لگیں جے اس کو بیاہ مھاری گدری نال ہونو چاہیے۔ اُنھاں ہی دِناں ماں وہ فقیر بھی بادشاہ کولے آ گیو جس کی پُھوک پھاک نال اُس ناں اللہ نے پُوت دِتو تھو۔ فقیر نے شہزادہ کا بیاہ آلی گل سُنی تے بادشاہ ناں کہن لگو۔۔۔ ٫٫تیرا پُوت کو بیاہ شہر ماں جہڑو غریب دھوبی ہے اُس کی دھیی نال ہوے گو،،۔ دھوبی کی دھیی اَنی کانی تھی جس کی وجہ نال اُس بیچاری نال کوئے وی بیاہ نیں کرے تھو۔ فقیر کی اس گل پر بادشاہ ناں ڈاہڈی لہر چڑھی تے فقیر ناں کہن لگو ٫٫فقیر صاحب یاہ گل کوئے اورمِناں کہتو تے ہوں اُس ناں سولی چاہڑھ چھوڑتو۔،، فقیر نے بادشاہ ناں کہیو کدے تِناں اپنا پُوت کی جان کی لوڑ ہے تے میری گل مَن لے تے اُس کو بیاہ دھوبی کی دھیی نال کروا دے۔ کدے نیں کراسے تے تیراپُوت کو بیاہ موت نال ہو جائے گو۔ بادشاہ نے فقیر کا کہن اُپر دھوبی کے گھر رشتہ واسطے دو آدمی چلایا کہ میرو نِکو تیری نِکی نال بیاہ کرے گو۔ دھوبی ڈاہڈو خوش ہویو۔ پر بادشاہ کا وزیر بادشاہ پر ڈاہڈا ناراض ہو گیا ۔ بلکہ بادشاہ کے خلاف ہو گیا۔ کُجھاں دِناں بعد بڑی ہی دھوم دھام نال بیاہ ہو گیو تے نال ہی بادشاہ وی بادشاہی تیں کڈھ چھوڑیو۔

بادشاہ تے اُس کی زنانی اپنا پُوت ناں نال لے کے دھوبی کے گھر جا بیٹھا۔ بیاہ تیں بعد کوئے یاراں سال گُذر گیا ، یارہویں سال بادشاہ کا پُوت کو اک بچو پیدا ہویو۔ بچو پیدا ہوتاں ہی بچہ کی ماں کی اکھاں ماں لوء آگئی ے لوء آتاں ہی دنیا بدل گئی بادشاہ فِر بادشاہ بن گیو۔

اک دن فقیر آیو تے کہن لگو ۔۔۔ ہُن تیریاں ستاں پیڑھیاں توڑی بادشاہی ہی بادشاہی رِہ گی۔ اس تیں بعد بادشاہ عیش تے آرام نال زندگی گذارن لگو تے اُس کی بادشاہی کو سلسلو اُس تیں بعد بھی جاری تے ساری رہیو۔

پاگل بادشاہ

کِسے زمانہ ماں کوئے بادشاہ تھو وہ بڑو ہی پاگل تے بے عقل تھو۔ اُس کی بادشاہی ماں کافی لڑائی جھگڑا ہوتا رہیں تھا۔ اک دن بادشاہ کا دربار ماں اک شخص آیو تے کہن لگو ٫٫ بادشاہ سلامت میرو مکان جھڑ گیو ہے تے کافی نقصان ہو گیو ہے،، بادشاہ نے کہیو ٫٫ فوراً اُس ناں حاضر کیو جائے جس نے اس کو مکان بنایو ہے،، ۔ تلاش شروع کردِتی گئی بڑی لوڑ لکاڑ توں بعد وہ مستری حاضر کیو گیو جس نے اُس کو مکان بنایو تھو۔ بادشاہ نے بڑا رُعب نال مستری ناں کہیو ٫٫ تیں اس بیچارہ غریب کو کیسو مکان بنایو جہڑو جھڑ گیو ،، مستری نے کہیو ٫٫ بادشاہ سلامت ۔۔ میری کائے غلطی نیں ہوں مکان کی دیوار چاہڑھ رہیو تھو جے اک خوبصورت گدری ہار سنگار کر کے مکان کولوں گُذر رہی تھی ہوں اُس دار دیکھتو رہیو تے اینٹ غلط لگ گئی جس کی وجہ توں مکان جھڑ گیؤ۔ بادشاہ نے حکم دِتو فوراً اُس گدری ناں حاضر کیو جائے ۔ خدمت گاراں نے گدری دربار ماں حاضر کی تے بادشاہ گدری ناں کہن لگو۔۔۔٫٫ بے شرمے تِناں شرم نیں آتی توں ہار سنگار کر کے چلے تے لوک تِناں دیکھ کے پاگل ہو جائیں؟۔ گدری نے جواب دِتو ٫٫ بادشاہ سلامت میری کائے غلطی نیں یاہ ساری غلطی اُس سنیارہ کی ہے جس نے یوہ ہار بنایو ۔ نہ سنیارو ہار بناتو نہ ہوں اپنا گاٹا ماں گھلتی تے نہ مستری کولوں غلطی ہوتی تے نہ ہی اُس غریب کو کوٹھو جھڑتو۔ گدری کا جواب سُن کے بادشاہ ناں جسرے اگ لگ گئی غصہ نال کہن لگو ۔۔ اِس گدری ناں لے جا کے سُولی چاڑھ دئیو۔۔ گدری بادشاہ کو یوہ حکم سُن کے ڈاہڈی ڈری تے ملازماں کو نظر بچا کے نس گئی۔ خدمت گاراں نے بادشاہ ناں جا کے کہیو جے بادشاہ سلامت گدری تے نس گئی ہے۔ بادشاہ کہن لگو کائے گل نیں گدری نس گئی تے کے ہویو کِسے اور ناں سُولی چاہڑھ دئیو۔ملازم باہر آیا تے کے دیکھیں جے دو فقیر راہ پر ٹُرتا جا رہیا ہیں اُنھاں نے جا کے اک فقیر پکڑ لیو ۔ دُوجا نال کا فقیر نے پُچھیو ٫٫ تم اِس ناں کِنگاں لے جا رہیا ہیں تے ملازم کہن لگا ۔۔۔ بادشاہ کو حکم ہے اِس ناں سُولی چاہڑھنو ہے ۔ دُوجو فقیر کہن لگو سنگیا فکر نہ کر ہوں بھی تیرے نال چلوں ہاں پر توں اک کم کرئیے جس ویلے تِناں سُولی چاہڑھن لگا توں کہیئے ہوں مروں تے ہوں کہوں گو نیں ہوں مروں ۔ مختصر اِسرے جے سُولی چڑھتے ویلے اُن دُوہاں فقیراں کی آپس ماں لڑائی ہو گئی اک کہہ تھو ہو سُولی چڑھوں تے دُوجو کہہ تھو ہوں۔ لوک بے بس ہو گیا جا کے بادشاہ ناں کہن لگا ۔۔ بادشاہ سلامت اُنھاں دُوہاں فقیراں کی زبردست لڑائی چل رہی ہے ۔ اک کہہ ہو ں سُولی چڑھوں تے دُوجو کہہ نیں ہوں چڑھوں۔بادشاہ یاہ گل سُن کے خود آ گیو تے آ کے اُن فقیراں ناں کہن لگو ٫٫ دسو کے گل ہے؟۔ فقیراں نے کہیو ٫٫ ہمناں پتو ہے جہڑو خوش قسمت اَج کے دھیاڑے مرے گو وہ اگلا جہان ماں بھی بادشاہی کرے گو،،۔ بادشاہ نے یاہ گل سُنتاں ہی خوش ہو کے کہیو ٫٫ کِسے ناں سُولی نہ چاہڑھیو میں خود سُولی چڑھنو ہے۔یاہ گل کہتاں ہی بادشاہ دوڑ کے سُولی چڑھ گیو ۔ ہُن پتو نیں وہ اگلا جہان ماں بادشاہی کرے یا نیں۔

دو سنگی

کِسے زمانہ ماں دو سنگی رہیں تھاجن کی آپس ماں بڑی محبت تے پیار تھو۔ ایکن بیاہ ہویو تے دُوجا کے سِر اُس نے پٹکو دھریو ، ہُن اُنھاں کی دوستی اور پکی ہو گئی ۔ جد اُس نے اپناسنگی کی بیوی دیکھی وَہ بڑی خوبصورت تھی تے اُس نے اِس پر اپنی نظر تبدیل کر لی۔ کُجھ وقت گذرن توں بعد وہ اپنا دوست کی بیوی ناں کہن لگو جے ہوں تیرے پر عاشق ہو گیو ہاں۔لہذا ہُن کے کراں ؟ ۔ وَہ بڑی ہی چالاک ہوشیار تے ایماندار گدری تھی ۔وَہ اُس ناں کہن لگی اَج شام ناں توں کوٹھا پر آئیے۔ وہ بد نیت سنگی شام ہوتاں ہی کوٹھا پر آ گیو تے وَہ گدری اپنا خاوند ناں کہن لگی۔۔۔ مھارے آس پاس دشمن لوک بسیں چل کوٹھا پر چکر لا کے آنواں۔اُس کو خاوند کوٹھا پر گیو تے کے دیکھے جے اُس کو سنگی کوٹھا پر بیٹھو وہ ہے ۔ وہ اُس ناں کہن لگو ٫٫ اوہ میرا یار توں اِت کے کرے؟،،۔اُس بے ایمان سنگی نے کہیو ٫٫ جے مھاری تے شرط لگ گئی تھی کُجھ لوکاں نے کہیو فلانو کوٹھو بڑو ہے ، کُجھاں نے کہیو فلانو بڑو ہے تے میں کہیو کہ نیں میرا سنگی کو کوٹھو ساراں کولوں بڑو ہے۔ فِر میں سوچیو ہوں جاؤں اپنا سنگی کا کوٹھا ناں دیکھ کے تے آؤں تاں اِت چلیو آیو تھو۔

دُوجے دن فِر وہ اُس گدری کولے آیو تے کہن لگو ہُن کے کراں؟۔ گدری کہن لگی ٫٫ اَج شام ناں گھاہ کی گھاڑی کولے آئیے،، وہ بد نیت سنگی چلیو گیو شام پئی تے گھاہ کی گھاڑی کولے جا کے بیس رہیو۔ گدری اپنا خاوند ناں کہن لگی ٫٫ اَج مال واسطے گھاہ تیں خود آننو ہے،،۔وہ جد گھاہ کڈھن گھاڑی کولے گیو اگے کے دیکھے جے اُس کو پیارو سنگی بیٹھو وہ ہے ۔ اُس نے پُچھیو اوہ میرا سنگی توں اِت کے کرے؟۔ اُس بدنیت سنگی نے جواب دِتو ٫٫ ہائے جی کے کروں گراں ماں اَج چور صلاح کریں تھا جے اَج فلاناں شخص کو گھاہ چھپاواں گا، میں سوچیو میرا سنگی کو کافی سارو مال ہے گھاہ کڈھے گیو تے نقصان ہو جائے گو۔ تاں ہی ہوں آکے تیری گھاڑی کی راکھی بیس گیو۔ اُس نے اپنا سنگی کی یاہ گل سُنی تے اُس کو مُچ مُچ شکریو ادا کیو۔

تیجے دن فِر وہ اُس گدری کولے آیو تے بڑی عاجزی نال کہن لگو٫٫ میرے نال دھوکو نہ کر ہُن دس ہُن کے کیو جائے،، گدری نے کہیو اَج شام ناں آ کے اندر مال ماں داند کو لے بیس رہیے ہوں اَج ضرور آؤں گی۔وہ آدمی چُپ کر کے چُھپ چھپا کے شام توں پہلاں ہی جا کے مال ماں داند کی کُھرلی ماں جا کے بیس رہیو۔ جد شام ہوئی تے بیوی اپنا خاوند ناں کہن لگی ٫٫ہُن زمینداری کو وقت آ گیو ہے رات سون توں پہلاں جا کے داند ناں ضرور دیکھنو چاہےئے لِسو تے نیں ہو یوتُوں جا پہلاں داند ناں دیکھ کے آ ۔ جد وہ اندر چوکھراں ماں گیو تے کے دیکھے جے داند کے کولے اُس کو وہ ہی پیارو سنگی بیٹھو وہ ہے۔سنگی کی سنگی پر نظر پئی تے کہن لگو اوہ میرا سنگی توں اَج فِر اِت کے کرے؟۔وہ بد نیت سنگی کہن لگو اَج گراں ماں شرط لگی وی تھی جے مھاری بستی ماں کِس کو داند تکڑو ہے۔ میں کہیو میرا سنگی کو داند تکڑو ہے۔ فِر میں سوچیو ہوں پہلاں جا کے اپنا سنگی کا داند ناں دیکھ تے آؤں یوہ نہ وے کہ ہوں شرط ہی نہ ہار جاؤں،تاں ہی آیو تھو۔وہ اُس ناں باہر لے آیو بیوی ناں کہن لگو چاہ بنا بیوی نے چاہ بنائی اپنا سنگی ناں چاہ پلا کے بیوی ناں کہن لگو تیں دیکھیو میرو سنگی کِتنو ہمدرد ہے۔بیوی کہن لگی اس بیچارہ کی ہمدردی کو مِناں پتو ہے ۔ مُڑ کے اپنا خاوند کا سنگی ناں کہن لگی ٫٫ اوہ بے ایمان توں میرا خاوند کو ہمدرد سنگی ہے ۔ یاہ ہی دوستی ہے تیری جے توں میرے دار بُری نظر نال دیکھے تھو ؟۔ اوہ بدنیتا ہوں تیری بہن ہاں ۔ وہ بدنیت شرم نال پانی پانی ہو گیو نالے اپنا سنگی کے سامنے اُس کو منہ کالو ہو گیو۔ فِر کے تھو بیچارو اُنھاں کے منہ لگن قابل وی نیں رہیو تے اک چنگا سنگی ناں وی کھڑا بیٹھو۔