رواجی ذہنڑ، کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ابرار حسین گوجر، گوجری مترجم

رواجی ذہنڑ

ایلس ہووے (Elias Howe)  امریکہ غا اک معمولی شہر مساچوچسٹ غو اک معمولی  کاریگر تھو۔ او 1819 وچ پیدا ہوا تے صرف 48 سال غی عمر وچ (1867)  اس غو  انتقال ہو غیو، پر اس نے دنیا ناں اک ایسی چیز دتی کہ دنیا مانھ  کپڑا غی تیاری ما انقلاب پیدا ہو غیو۔ یا سلائی مشین تھی جیہڑی 1845 وچ اس نے ایجاد کی تھی۔

ایلس ہووے نے جیہڑی مشین بنڑائی تھی شروع مانھ اس غی جڑ غے پاسے تاغا غو چھید  تھو۔ جس طراں عام ہتھ غی سویاں وچ وے۔ سالہا سال دیں انسان سوئی غی جڑ وچ ای چھید کرتو آئیو اے۔ اس واسطے ایلس ہووے نے وی رواج غے مطابق  اپنڑیں ایجاد کردہ مشین غی جڑ وچ ای چھید کیو۔ جس غی وجہ دیں اس غی مشین چنگی سلائی نیتھی کرے۔  شروع وچ او اپنڑیں مشین نال صرف  جوتا ای سلائی کر ہکے  تھو۔ کپڑا غی سلائی اس دیں ممکن نیتھی۔

ایلس ہووے اک ویلا تک اس قضیہ غو شکار رہیو پر او کوئی حل کڈنی سکیو۔  اِسے سوچ وچ اس نے اک خاوو دیکھیو جس خاوونے اس غو مسئلو حل کر شوڑیو۔  اس نے خاوو وچ ڈیھڈو کے اک وحیشی قبیلہ غے بندیں  اس ناں پکڑ لیو اور اس ناں حکم دتو کہ 24 گھنٹاں غے اندر سلائی مشین تیار کر ے نہ تے اسناں قتل کر شوڑیں غا۔ اس نے کوشش کی پر دتی وی مدت وچ مشین تیار نی کر سکیو۔ جیلے ٹیم برابر ہوا تے قبیلہ غا لوک اس اوپر حملو کر یا واسطے دوڑ پیا ۔ اناں غا ہتھاں وچ برچھیں تھیں۔ ہووے نے غور نال ڈیھڈو کہ ہر برچھی غی نوک اوپر سوراخ تھو۔ یو  دیخیا  غی دیر تھی کہ اس غی اَکھ کھل غئی۔

ہووے ناں سرو لبھ غیو۔ اس نیں برچھی غی طرح سوئی غی نوک اوپر چھید کیوتے اس وچ تاغو بائیو۔ ہونڑ اس غو مسئلو حل ہو غیو کہ جیہڑی مشین چھید اوپر ہویا غی وجہ دیں کم نیتھی کرے وا چھید تھلے ہویا  نال سوہنڑوں کم کرینڑ نغ پئی۔

ہووے نال مسئلو یو تھو کہ او  رواجی ذہنڑ دیں اوپر اٹھ غے سوچ نیتھو سکے۔  او سمجھے تھو جیہڑی چیز ہزاراں سالاں دیں چلی آئے واہی صحیح اے۔ پر جیلے اس غا  لاشعور نیں اس ناں تصویر غو دوسرو رخ دسیو اس ویلے او گل سمجھیو تے اس ناں حل کر لیو۔  جس ویلے آدمی اپنڑیں ساری توجو کسے کم اوپر لا شوڑے تے اس ویلے او گل تک اس طرح پہنچے جس طرح الیس ہووے  پہنچیو اے۔

کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر