با مقصد زندگی، کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر

ابرار حسین گوجر، گوجری مترجم

با مقصد زندگی

ایکسپریس ٹرین  پوی رفتار نال  اپنڑیں منزل در نستی جائے۔ راہ وچ دوئیں پاسیں سرسبز کھیتاں،  لبریز ندیاں تے نالاں غو مسلسل منظر نظارہ کی دعوت دیے۔ پر تیز نستی ٹرین ناں اناں خوش نما منظراں  ور کوئی دلچسپی نیں۔ پستی تے بلندی، خشکی تے تری اس غی رفتار مانھ کوئی فرق نی پیدا کرتا۔ راہ وچ چھوٹا چھوٹا  اسٹیشن آئیں ور وا اناں ناں چھوڑتی وی نستی جائے۔ لگے اسناں کتے وی ٹھہرنو نِیں۔

بامقصد زندگی غو معاملو وی کجھ اسی طراں غو اے۔ جس آدمی نے اپنڑیں زندگی غو اک مقصد بنڑائیو وے، اس غی ساری توجو  اپنڑاں مقصد اوپر ای وے۔ ایاں اوآں غا مسئلاں وچ او اپنڑوں ٹیم برباد نیِ کرتو۔

بامقصد زندگی گزاریا آلو آدمی ایسا مسافر غی طراں اے جیہڑو اپنڑوں اک اک لمحو اپنڑیں منزل ور پہنچیا واسطے صرف کرے۔ دنیا غا خوش نما منظر اسناں اپنڑیں پاسے متوجو کریں پر او اکھ بند کر لیے۔ چھاں تے سراں اسناں رکیا تے سستایا غی گل دسیں پر او اناں ناں ٹھکرا غے اپنڑیں منزل غو سفر تے کرتو چلے۔ زندگی غا نشیب و فراز اس نال ٹکرائیں پر اوس غی رفتار ما کوئی فرق نی پیتو۔

بامقصد آدمی غی زندگی اک بھٹکیا وا آدمی غی مانندنیں ہوتی کہ جیہڑو سفر غی سمت نہ ہویا غی وجہ دیں کدے اک پاسے ٹر پے تے کدے دوئے پاسے۔ اس غا ذہنڑ ما منزل تے راہ غو شعور واضح وے۔  اس غے سامنڑیں راہ متعین وے۔ اے جیو آدمی کس طراں کِدرے رُک سکے۔ کس طراں بے مقصد چیزاں مانھ  وقت ضائع کر سکے۔ کیونکہ اس ناں اپنڑیں  ساری توجو اپنڑاں مقصد در کر غے اپنڑاں مقصد در  جانڑوں اے،  او آس پاس دیں بے نیاز ہو غے اپنڑاں کم ما لگو رہ غو ، اس ویلا توڑی کہ جب تک اپنڑوں مقصد تے منزل نہ پا لیے۔ 

زندگی ناں بامقصد بنانڑ لیئ یا گل ضروری اے کہ آدمی کوئی مقصد یا سمت متعین کر لیے۔ جس مقصد غی صداقت اوپر اس غو ذہن مطمئن وے۔ جس ناں حاصل کرنڑ لئی اس غو ضمیر اس غے نال وے۔  جیہڑو اس غیاں رغاں وچ خون آروں دوڑے۔ یوہی مقصد غو تعین انسان ناں جانوراں تیں الگ کرے۔ جے قدے یو(مقصد)  ناں وے تے انسان تے جانور وچ کوئی فرق نی۔ جس آدمی غے اندر مقصدیت آیائے پکی گل اے کہ اس غی زندگی اک تبدیل شدہ زندگی وے۔ او چھوٹی چھوٹی بے مقصد گلاں وچ نی الجھتو بلکہ اس غی نظر صرف اپنڑاں مقصد اوپر ویں ۔ اس غو ہر قدم اپنڑاں مقصد در اٹھے کہ اک ویلو آئے تے منزل اس غی مقدر ٹھہرے۔  

کتاب: راز حیات، مصنف: مولانا وحید الدین خاں، گوجری مترجم: ابرار حسین گوجر