معاشرہ گی بگڑتی صورتحال ذمہ دار کون؟، کالم نویس: شازیہ چودھری، کلر راجوری جموں وکشمیر

کالم نویس: شازیہ چودھری

معاشرہ گی بگڑتی صورتحال

ذمہ دار کون؟

کسے وی ملک یاریاست گی خوشحالی مانھ عوام ہی حکومت گا اصل موجد ہوئیں۔ ہورحکومت گی اولین ذمہ داری ہوئے جے عوام گا مُنڈھلا حقوق تے فرائض ادا کرن نانھ پہلی ترجیح دے۔ مہارو ملکی ہور ریاستی آئین دوئے ہی اس گل گی ضمانت دیں جے حکومت عوام گی مُنڈھلی ضروریات زندگی گی فراہمی فلاح تے بہبود ہور انھاں گی خوشحالی گی اصل ذمہ دار ہے۔ ور آزادی گی ستر دہائیں گزر جان بعد وی مہاری ریاست جموں کشمیر گا تقریباً ہر ضلع گا کئیں علاقہ اِسا ہیں، جِت عوام اَج وی زندگی جین گی مُنڈھلی ضرورتاں ہور سہولتاں تیں محروم ہیں۔ ہور عوام گی بڑی تعداد غربت گی لکیر تیں تھلے زندگی گزارن ور مجبور ہے۔ مہاری ریاست گا تقریباً ہر ضلع گا دور دراڈے ہور پہاڑی علاقا جِت تقریباً 60 تیں ستر فیصد آبادی گجر بکروال ہور پہاڑی طبقاں سنگ تعلق رکھیں۔ اَج اکیہویں صدی کے بلکن ہُن تے بائیویں صدی کاہنھ تے غلط نیہں ہوسیں۔ اس مانھ وی تعلیم جس نانھ ہر مسئلہ ہور مشکل گا حل گی سرٹیفیکیٹ گو درجو حاصل ہے۔ اسے تیں محروم ہیں۔ اس گے نال نال طبی سہولتاں گی تھوہڑ ہور سڑکاں گو نہ ہونو عوام گا مسئلاں گی پہلی فہرست مانھ آنویں۔ اس مانھ کوئے شک نیہں جے ریاست مانھ ہر دو یا ترے کلو میٹر بعد اسکول قائم کیا گیا ہیں۔ فر تعلیم متاثر کیوں دراصل اسکول تے قائم ہو گیاور انھاں دور دراڈے ہور پچھڑیا علاقاں مانھ سڑک جیہڑی جے رابطاں گی شہ رگ گو درجو رکھیں۔سڑکاں گا نہ ہون گی وجہ تیں عوام نانھ ترے تیں چار کَہنٹاں توڑی پیدل چلنو پوئے۔ اِسا علاقاں مانھ کوئے وی سرکاری استاد جان نانھ ترجیح نیہں دیتو۔ ہور انھاں علاقاں تیں کوئے وی پڑھ لکھ گے اس قابل نیہں بن سکتو جے انھاں اسکولاں مانھ استاد گی حیثیت پا سکے ہور اپنا پچھڑیا علاقاں گا بچاں گا مستقبل نانھ محفوظ کر سکے ۔جد جے محکمہ تعلیم نے ہارڈ زون پالسی شروع کی ہور ہر استاد نانھ اِسا علاقاں مانھ دو دو سال واسطے فرائض انجام دینا لازمی قرار دتا۔ ور جنھاں گا مقدر مانھ اندھیرا ہی اندھیراکَہر کر گیا ہوئیں تے انھاں واسطے کائے وی پالسی کار گر ثابت نیہں ہوتی ۔کیونجے یہ استاد مہینہ مانھ ایک دو بار اسکولاں مانھ چکر لا کے باقی تیہاڑا کَہر ور اَرام فرمانویں ۔

ہور کجھ حکومت گی ملی بھگت سنگ اپنی پوسٹنگ واپس اِسا علاقاں مانھ کروا لیں جِت انھاں نانھ وسیلا ہور سہولت میسر ہوئیں، ہور کئیں تے اپنا اثر رسوخ گو استعمال کرتاں واں محکمہ تعلیم نانھ چھوڑ گے دوجا محکماں ،جِت کہٹ محنت کرنی پوئے اٹیچمنٹ کرا لیں ہور جد امتحان ہون آلا ہوئیں تے واپس اپنی اپنی جایاں پر آ جئیں کیونجے انکریمنٹ گو مسئلو ہوئے۔ ہور انکریمنٹ تد ہی ملے گی جد رزلٹ دیں گا ہور فر شروع ہوئے چہوٹھ تے فریب گو نہ رکن آلو سلسلو کیونجے انھاں طلباءنانھ جنھاں نے پورو سال نہ ہی اسکول گو ہور نہ ہی استاداںگوچہرو تک دیکھیو ہوئے۔ انھاں نانھ اگلی جماعت مانھ پاس کر گے داخلو دے دتو جئے ہور یوہ ہی عمل ہر سال دہرایو جئے۔ہوں اِس گل گے خلاف نیہں جے رہبرِتعلیم اسکیم کیوں شروع کی گئی۔ بلکن اس گل نانھ سمجھن تیں قاصر ہاں جے کدے کہٹ تعلیم یافتہ نوجواناں نانھ روزگار ہی دینو تھو تے رہبرِ تعلیم ہی کیوں؟ رہبرِ جنگلات تے ماحولیات یا محکمہ پی ایچ ای وغیرہ مانھ کیوں نیہں؟ وہ اس واسطے جے بارہویں پاس نوجواناں نانھ جد استاد بنہا دتو گیو تے نظامِ تعلیم دھرم بھرم ہویو۔ہور نتیجو یوہ ہویو جے عوام نے سرکاری اسکولاں تیں اپنا بچاں نانھ کڈھ کے پرایﺅیٹ اسکولاں مانھ داخل کرانو شروع کیو۔چلو ہُن انھاں نانھ محکمہ تعلیم مانھ روزگار تے لبھ گیو ور اُنگلیاں ور گنیا جان آلا ویہ استاد ہی اِسا ہیں جنھاں نے تدریسی طریقہ کار نانھ اپناتاں واں اپنی اعلیٰ تعلیم ہور مطالعہ نانھ جاری رکھیو ہے۔ اِسا اسکولاں مانھ جِت انھاں اسکیماں کے تحت کم کر رہیا استاد ہیں، مُچ کہٹ دیکھن مانھ آیو ہے جے بچاں نانھ تعلیم گے نال نال ہچھی تربیت وی دتی جا رہئی ہوئے۔بچاں نانھ معاشرہ گا آداب،اخلاقیات ہور سماجی طور طریقاں سنگ آشنا کیو جاتو ہوئے۔بچا نانھ اس کی مذہبی کتاباں سنگ وی جوڑن گی تلقین کی جاتی ہوئے۔بچا نانھ صرف نصاب توڑی ہی محدود رکھیو جئے۔ہور جد بچو معاشرہ مانھ کوئے غلط قدم چاوے ،یا غیر اخلاقی رویو اپناوے تے ایکدم استاد گو ناں آوے ۔فر اِسا استاد اپنو ناں کتنو روشن کریں وہ دَسن گی لوڑ نیہں۔یہ ہی طلباءجد اِسا استاداں ہورسماج گی طرفوں منفی روّیا گا شکار ہوئیں ہور وسیلاں گی تھوہڑ گی وجہ سنگ روزی روٹی گی تلاش مانھ اپنا کَہروں بے کَہر ہو گے اِسا علاقاں گو رخ کریں ۔جِے مزوری گا موقعا فراہم ہوئیں۔

کیونجے جنھاں دور دراڈے ہور پچھڑیا علاقاں مانھ انھاں گو بسیرو ہوئے ، اُت انھاں بے کساں نانھ مزوری وی نیہں لبھتی۔ ہور اسطریح ویہ ہمیش واسطے تعلیم جِسی نعمت تیں محروم ہو جئیں ہور حکومت گا کھاتا مانھ کئیں جرماں گے نال نال ایک ہور جرم بچہ مزدوری ( Child Labour) گوباہدو وی ہو جئے۔ یوہ ہی حال طبی محکمہ گو وی ہے ۔انھاں علاقاں مانھ طبی سہولتاںگی وی کمی ہے ۔تعلیم انسان نانھ زندگی جین گو سلیقو ہور شعور دے ہور صحتمند انسان ہی کامیاب زندگی جی سکے۔ انھاں علاقاں مانھ طبی عملہ گی غیر حاضری ہور غیر ذمہ دارانہ روّیا گی وجہ سنگ عوام نانھ ڈسٹرکٹ ہور سب ڈسٹرکٹ ہسپتالاں گو رخ کرنو پوئے۔ جنھاں ہسپتالاں مانھ بہتر طبی سہولت میسر ہیں کدے کائے حاملہ کالسری درد زہ مانھ مبتلا ہو جئے تے اس نانھ پہلاں منجھی ور چا گے دو ترے کَہنٹا توڑی پیدل چلن بعد گڈی توڑی پوہچ سکیں۔ ہور فر اُتوں ترے تیں چار کَہنٹاں گو سفر طے کر گے کئیں کلو میٹر توڑی گو کرایو خرچ گے ضلع ہسپتالاں توڑی پوہچیں۔ ہور کئیں حاملہ کالسریں ہور جمتا بچا راہ مانھ ہی دم توڑ دیں۔ جیہڑا ہسپتالاں توڑی پوہچ وی جئیں۔ تے انھاں نال ڈاکٹراں ہور باقی ہسپتالی عملہ گو رویو دل نانھ چھیک لان آلو ہوئے۔ متعلقہ لیڈی ڈاکٹر تیں لے گے جتنا وی ڈاکٹر صاحبان یا نِکا اسٹاف آپریشن تھیٹر یا دوجا طریقہ کار سنگ علاج مانھ سِدھایا کسے ہورواسطہ نال جڑیا ہوئیں، علاج گے عوض پیسا وصول کریں۔ جد جے لوس ہور جمتا بچہ دواں نانھ سرکار نے سرکاری ہسپتالاں مانھ مفت علاج گی سہولت مہیا کی ہیں۔ کدے انھاں دور دراڈا تیں آیا لوکاں کول پیسا ادا کرن واسطے نہ ہوئیں تے انھاں نانھ ہسپتال تیں ڈسچارج ہون گی اجازت نیہں ملتی ۔انھاں حلاتاں مانھ یہ غریب ہور سِدھاسادہ لوک پہیکھ توڑی منگن ور مجبور ہو جئیں، ہور ڈاکٹراں نانھ رقم ادا کریں۔ کئیں مزور پیشہ لوک مزوری کرتاں واں یا کوئے وی جفا کشی آلو کم کرتاں واں ،کدے کسے بُوٹا تیں ،کسے پہاڑی ماہلی تیں رُہڑھ یا کسے اوزار سنگ زخمی ہو جئے تے فرسٹ ایڈ ( First Aid) توڑی گی سہولت وی دستیاب نیہں ہوتی ۔ یاہ ہی نیہں بلکن انھاں دور دراڈے علاقاں مانھ مزوری توڑی گی سہولت میسر نیہں ہیں۔ ایک ترقی یافتہ ملک اندر عوام ہی ریاست گو اصل اثاثو ہوئیں۔ ایکن فلاحی ریاست اندر شہریاں تیں ٹیکس گی مدد مانھ بٹلی ہوئی رقم گو بڑو حصو شہریاں گی فلاح تے بہبود ور خرچ ہوئے۔

ور مہارے اِت اِسو ہوتو وؤ دِستو نیہں۔ حکومت گی سب تیں اہم ذمہ داری روزگار گا نواں نواں موقعا پیدا کرنو ہے فیکٹریاں ، کارخاناں ہور صنعتاں گا قیام جس تیں لوکاں گی بےروزگاری مانھ کمی واقع ہو ئے ہور فر پڑھیا لکھیا لوکاں نال نا خواندہ ہور پچھڑیا وا لوک وی پہر پہور طریقا سنگ اپنی صلاحیتاں نانھ باندے کر گے نہ صرف اپنا کَہراں مانھ بلکن معاشرے مانھ وی اپنو مقام بنہا سکیں۔عوام نانھ سہولت پوہچانو سرکار گی ذمہ داری ہے نہ جے عوام ور احسان ور افسوس جے ووٹ بٹورن گی لالچ مانھ سیاسی ٹھیکیدار عوام نانھ گداگر سمجھ گے اس گی کشکول مانھ سٹنو احسان سمجھیں۔ ہور عوام پنج چھ سال انھاں ہی احساناں تھلے دبی رہ۔عوام نانھ لوڑ ہے سجاگ ہون گی۔ ہور اپنا حقوق تے فرائض تیں واقف ہون گے نال نال سرکار گا فرائض تیں واقف ہونو وی لازمی ہے ۔تانجے معاشرہ گی ترقی نانھ ممکن بنہان واسطے سرکار نانھ حق اطلاعات گے تحت جوابدہ بنہایوجا سکے۔جد توڑی سماج گو باشعور طبقو خاموش رہ گو تد توڑی ترقی ممکن نیہں۔مُنڈھلی سہولتاں گی مانگ واسطے سماج گا ہر فرد نانھ اَگے آن گی لوڑ ہے ۔یوہ مہارو حق ہے۔ہور حق واسطے اواز چانو جُرم نیہں۔  (مُک چُک(

کالم نویس: شازیہ چودھری، کلر راجوری جموں وکشمیر