گوجری زبان غو مستقبل، کالم نویس: شازیہ چودھری، کلر راجوری جموں وکشمیر

کالم نویس: شازیہ چودھری

گوجری زبان غو مستقبل

کسے وی‌ زبان غو مستقبل اس زبان غا لکھاڑیاں غاہتھاں ماں وے، زباناں غا اسکالر شاعر ادیب تے مصنف کسے وی قوم غو حساس طبقو ہوویں ، کدے زباناں غی پال پوس تے دیکھ ریکھ نہ کی جے تاں بلیں بلیں دوجی زباناں غا اثر نال وے زبان اپنی مٹھاس تے ٹھیٹھ پن گما بیسیں تے فر دوجی زباناں غو اثر پہارو پیتاں وے زبان وہ ہی اثر قبولتاں دوجی زباناں ماں گڈ مڈ ہو جیں تے اپنی پچھان گما بیسیں۔

کسے وی زبان ناں جیتاں رہن واسطے اس زبان غی بول چال صحیح تے ٹھیٹھ الفاظ غی ادایگی ہور اس زبان غو رسم الخط ہوے۔

گوجری زبان ماں وی گوجری زبان لکھی جے دیو ناگری رسم الخط غا موجد گجر ہی ہیں گوجری زبان ماں کیء ہزار غی تعداد ماں کتاب لکھی گئی ہیں ور اجاں توڑی پڑھن آلاں غی تعداد جتنی چاہیے تھی اس‌غا مقابلہ ماں کہٹ رہی ہے اتے دوجے پاسے ہم اپنی آن آلی نسل نال بڑا فخر نال اردو یا دوجی زبان بولاں جس غی وجہ نال مہاری آن آلی نسل اپنی مادری زبان تیں دور ہور احساس کمتری غو شکار ہوتی جا رہی ہے

اس راہ ہم آپے ہی اپنی ماں بولی غا مستقبل ناں اندھیرا آلے پاسے لے جا رہیا ہاں تے جے کدے مادری زبان بولاں وی تاں ٹھیٹھ لفظ نہیں بولتا دوجی زباناں غا الفاظ گڈ مڈ کر غے بولاں اسطرح زبان غی صحت مچ حد تک ہم نیں آپے خراب کر لی ہے

اس موضوع ور سوشل میڈیا ور روز کاے نہ کاے بحث چھڑی وی دسے ور ہوں جد وی اس بارے سوچوں آں مناں مولانا جلال الدین رومی رحمۃ االلہ علیہ غی لکھی وی مثنوی یاد آ جے جس ماں انہاں نے یاہ حکایت بیان کی ہے جے اک لومڑی جنگل ماں ٹرے تھی تے زوردار بارش شروع ہو گئی لومڑی دوڑتاں دوڑتاں تلک غے ایکن ڈاب ماں جا ٹھٹھی تے خصیرا جتناں تیں بعد وی ڈاب تیں باہر نہ آ سکی واہ زندگی تیں مایوس ہو گئی تھی جے اچریں اس ناں اک بکری آتی دسی اس غا شاطر دماغ نے اک ترکیب سوچی بکری بیچاری تسای وی تھی تے ڈاب ماں پانی دیکھ غے کہن لگی میرو تے تس نال پہیڑو حال ہے۔

لومڑی نے بکری نا کہیو ادی بکری مچ پانی ہے آ نا رج غے اتے ‌پانی پیاں تے فر نالے چلاں غی سادی بکری اک دم چھال مار غے ڈاب ماں کد غی رج غے پانی پین تیں بعد بکری ناں ہوش آیو تے واہ پانی گی ڈاب تیں باہر نکلن واسطے جتن کرن لگی شاطر لومڑی نے کہیو ادی بکری توں کھل ہوں تیرا ور سوار ہو گے باہر نکلوں تے فر تنا چھک گے باہر کڈوں سادی بکری نے سوچن بغیر اسو ہی کیو تے لومڑی باہر نکل گے نس گی۔

یاہ حکایت ات بیان کرن غو میرو مقصد یوہ ہے جے اج گوجری زبان نال وی کجھ اسو ہی ہوے لگو گوجری زبان ناں ترقی دین غا ناں ور مچ سارا لوک یاہ ہی چال چلیں لگا میری یاہ گل شاید کسے ناں مندی لگے لیکن حقیقت یاہ ہی ہے جے گوجری زبان غا کردار ناں ہم گھٹا بیٹھا ہاں۔

گوجری زبان جہیڑی جے بر صغیر تیں علاوہ کی دوجا ملکاں ماں وی بولی تے سمجھی جے گوجری زبان اردو غی ماں ہون غے باوجود وی وہ مقام حاصل نہیں کر سکی جس غی یاہ حقدار ہے ریاستی کلچرل اکادمی ریڈیو تے ٹی وی نے البتہ گوجری زبان ناں خصیری سگ لای ان اداراں غا قیام نال خصیری تعداد ماں لکھاڑی تیار ہویا ور حال یوہ ہے جے ان مصنف حضرات وچوں اس ویلے کجھ اک وی اپنی ذاتی زندگی ماں گوجری زبان ماں گل نہیں کرتا ان وچوں کتنا اک ہیں جہیڑا گوجری پڑھیں پڑھاویں لکھیں یا لکھاویں میرا خیال ماں اس سوال غو جواب ہم ناں آپے اپنی بکل وچوں لبھ جے غو جے ہم ندامت نال اپنی گردن نیویں کراں۔

ہم ناں کسے وی کم غی شروعات پہلاں اپنا گھر تیں کرن غی لوڑ ہے ہم ناں آپے سوچنو ہے جے ہم ۔ماں بولی غی بتری تہاراں غو قرض کتنو ادا کر رہیا ہاں ماں جس نے ہم ناں پچھان دتی واہ مندی تے موسی سوہنی یوہ کت گو انصاف ہے جے مہارو پیار موسیاں نال ڈونگو ہوتو گیو تاں ماں ٹٹا وا منجھا غا ترنجھ ماں پی روتی تے کرلاتی اپنا بچاں غی بے مہری ور ساس مارتی رہ جے غی۔

او اج ہم سارا یوہ عہد کراں جے اج تیں بعد اپنا بچاں نال گھراں ماں صرف اور صرف گوجری بولاں غا

گوجری پڑھاں تے پڑھاواں گا نالے گوجری لکھاں تے لکھاواں گا گوجری زبان ناں نصاب ماں شامل کران گی جد وجہد جاری ہے ہور کسے حد تک انشاءاللہ یاہ جدوجہد رنگ وی لیای ہے اعلی تعلیم ماں گوجری زبان غی شمولیت غو عندیو لبھو ہے لیکن یاہ جدوجہد تد تک جاری و ساری رہ گی جد تک یاہ بنیادی تعلیم غو اہم حصو نہیں بن جاتی اس واسطےہمناں اج تیں تیاری کرنی پوے غی جے کدے نوجوان ماہر لسانیات نال مل غے ورکشاپ وغیرہ منعقد کریں تے وہ دن دور نہیں جد ہم اس عظیم زبان غی گھٹی وی شان ناں دوبارہ بحال کرن ماں کامیاب ہو جاں غا بس ضرورت ہے اک دوجا نال مل غے کم کرن غی۔

اس سلسلہ ماں پہل کرتاں واں انجمن گوجری زبان و ادب دھرم سال کالا کوٹ راجوری نے سوشل میڈیا غی افادیت ناں نظراں ماں رکھتاں واں آواز گجر فیسبک چینل مہارا ہتھاں ما دتو ہے اس گے نال نال پرنٹ میڈیا ماں وی اپنا قدم جماتاں پہلو مکمل گوجری اخبار روداد قوم ہم ناں تحفہ ماں دے گے ماں بولی غی بتری تہاراں غو حق ادا کیو ہے بس ضرورت ہے تے صرف اس گل غی جے اپنا ذاتی اختلافات ناں اک پاسے رکھ غے اک دوجا نال مل غے انجمن گا ان دوواں ہتھیاراں ناں ماں بولی،غی تراش خراش واسطے مثبت رخ ماں استعمال کرن غی اس تیں علاوہ انجمن غی طرفوں جموں کشمیر غا ہر ضلع ماں گوجری ماہر لسانیات ناں بلا غے گوجری ورکشاپ منعقد کران واسطے کم کیو جا رہیو ہے بس ضرورت ہے اس نیک کم ماں ہتھ بٹای کرن غی مگر مہارے کولے اتنو کجھ ہون غے باوجود مہاری ماں بولی غو حال اس سادی بکری آلو ہے ہور اس غی وجہ ہے مہارا ذاتی اختلافات

اگر ہم ذاتیات تیں اوپر اٹھ غے کم کراں غا تے انشاءاللہ گوجری زبان غو مستقبلِ روشن ہے۔

اللہ ہم سب ناں اتفاق نال کم کرن غی توفیق دے آمین ثم آمین۔

کالم نویس: شازیہ چودھری، کلر راجوری جموں وکشمیر