جدت، میاں محمد یوسف، گوجری لکھاری

میاں محمد یوسف، گوجری لکھاری

جدت

میاں محمد یوسف

کرم دین تے شرف دین دو پہائی تھا دوئے اس وقت کے مطابق پڑہیا لکھیا وا تھا جد دواں کی شادی ہوگئی تے کنی کنی ہو گیا کرم دین پنج وقتی نمازی تے نیک انسان تھو جد کہ شرف دین نماز کہٹ ہی پڑہے تھو البتہ جمعہ عید وغیرہ پڑہ لئیے تھو دوئے پہائی سرکاری نوکر تھا کرم دین محکمہ پولیس ماتھو تے شرف دین بیٹ کو گارڈ تھو کرم دین گراں کو ماحول خراب ہوتو دیکھ کے پریشان تھو اس کو دل نیھ لگے تھو فتنہ فساد زیادہ ہو گیا جبکہ شرف دین کوئی اثر نیھ لئیے تھو اس نے بیاہ بھی عاشقی نال کیو تھو جبکہ کرم دین کو بیاہ ماں تے باپ کی رضا نال ہویو تھو خیر کرم دین کی تبدیلی ہو گئی شہر مانھ آ گیو کجھ عرصہ بعد اوہ اپنو ڈیرو شہر لے آیو اللہ تعالیٰ نے کرم دین نا دو بچیں تے ایک پوت دتو بچیاں کا ناں راشدہ فاخرہ بچہ کو ناں قاسم تھو تے شرف دین کے کہر ایک بچی تے ایک پوت پیدا ہویو پوت کو ناں حسن تے تہی کو ناں عابدہ تھو کرم دین نے اپنا جاتک شہر کا اچھا مدرسہ مانھ داخل کیا اس کی کہر آلی عاتکہ خفا ہوئی کہ ہوں بچاں بغیر نیھ رہ سکتی لوک طعنہ ماریں گا کہ بچاں کی روٹی تو تنگ ہو گیا وغیرہ مگر کہر ما کرم دین کو ہی آڈر چلے تھو کرم دین کی سسو شہر آئی تے کرم دین کی بیوی نے دسیو کے واہ کرم دین نال گل کرے کہ بچا بے شک پڑہیں پر رات کہر مڑ آویں اس نے گل کی تےکرم دین نے کہیو کہ اپنا پیار واسطے بچاں کی زندگی نیھ خراب کر سکتو جمعرات نا بچہ کہر آویں بار کی صبح فر مدرسے چلے جائیں ایک تہیاڑے شرف دین اپنی بیوی شہینہ سمیت شہر آیو رات کرم دین کے کہر رہیو تےدواں نے ان دواں نال مچ گل کیں فر کہن لگا کہ تم بچاں بغیر کس طرح وقت گزارو سکول داخل کراؤ رات بچہ کہر تے مڑیں مولوی بن کے کس طرح زندگی گزاریں گا ہم نے اس واسطے اپنا جاتک سکول ماں داخل کیا کہ پڑھ لکھ کے اچھی زندگی گزاریں کرم دین نے کہیو کہ صرف پیسو کمانو بڑی گل نیھ انسانیت بڑی شے ہے بلکہ تم میری منو تے بچہ مدرسہ مانھ داخل کراؤ شرف دین کی کہر آلی کہن لگی نہ پہائیا ہوں تےاپنا بچاں نا مولوی نیھ بناتی تنگ نظر تے سادہ میرا بچہ انجینئر تے ڈاکٹر بنیں گا خیر گل بات چلتی رئی شرف دین کا جاتک میٹرک پاس کر گیا اور کرم دین کے جاتکاں نے قران مجید حفظ کرلیو قربانی کی عید آگئی کرم دین کا بچہ مدرسہ تو چھٹی کہر آیا تے کرم دین کی بیوی نے گل کی کے اس وار عید گراں جا کے مناواں کرم دین من گیو ویہ سارا عید تو دو تہیاڑا پہلاں گراں چلے گیا جد سارا بیٹھا تے شرف دین کی بچی آئی ماں نا کہن لگی کے ہوں اپنی سہیلی کے کہر چلوں رات مڑوں گی اس نے شرف دین نا پچھیو کہ نکی یاہ گل کہ اس نے ازن دتو تے شہینہ نے کہیو مہیس اگے کہا کہ کے جا جلدی مڑیے کہر مچ کم ہیں تے کرم دین نے کہیو کہ حسن کت ہے اوہ بہن نا چھوڑ آوے اس پر شرفو کی بیوی نے دسیو کہ اوہ کتے سنگیاں نال ہوئے گو خیر ہے یاہ روز کہلی جائے چلے جائے گی کرم دین کی بیوی عاتکہ کہن لگی یہ نوں ہی لگا رئیں جا بچی توکرم دین چپ ہو گیو کرم دین کا بچہ کہن لگا کہ تم گپ شپ لاؤ ہم قران پاک پڑھ لیاں کرم دین کہیو جاؤ پڑھو نماز عید پڑھی اس تو بعد میل ملاپ ہویو شہینہ کچن ماں تھی عاتکہ ات گئی پچھن لگی ہوں کجھ مدد کروں تے شہینہ نے کہیو نہ پہابھی تو بیس کم کروں گل کراں عاتکہ بیس گئی تے شہینہ نا پچھیو عابدہ کجھ کچن کو کم کرے یا نہ شہینہ کہن لگی نہ بہن بس پڑھائی تو فرصت نیھ ملتی عاتکہ نے کہیو کجھ کم سکھا میرے راشدہ تے فاخرہ جد کہر آویں سارو کہرکو کم کریں شہینہ ہس کے کہن لگی سکھ لئے گی اجاں نکی ہے فر تیری بچیں تے مدرسہ بچ ہیں انہاں پر بوجھ نیھ میری عابدہ کی کتاب مچ ہیں بلکہ میری من تے کرمو ادا نا راضی کر کے بچیاں نا مدرسہ تو کڈہا کے سکول مانھ داخل کروا تانجے ویہ کجھ زندگی کا رنگ ٹہنگ سکھیں عاتکہ نے سر پر ہتھ رکھ کے کہیو بہن مچ سمجھایو پر تیرو جیٹھ نیھ سنتو میری ماں نے بھی گل کی پر نہ سنی شہینہ نے نک چھکیو چل دیکھ فر اتنا مانھ شرف دین نے آواز دتی شہینہ چاہ تے بنا شہینہ نے جواب دتو کہ ہوں سالن بنا کے بناؤں اتنا مانھ راشدہ کچن مانھ آئی تے کہن لگی چاچی تم لوتر پکاؤ چاہ ہوں بناؤں چاہ پی کے شرف دین کی بچی عابدہ نے راشدہ تے فاخرہ نا کہیو آؤ باہر فر ٹر کے آواں بچیاں نے ماں باپ کولوں اجازت لی تے اس نال چلے گئیں راہ مانھ ایک نوجوان ملیو تے عابدہ نال دعا سلام ہوئی تے اس نے تعارف کرایو کہ یہ میرا تایا کی بچی ہیں راشدہ تے فاخرہ نال اس نے کجھ گل کرن کی کوشش کی پر انہاں نے کوئی جواب نہ دتو عابدہ اس ناں کہن لگی کے ہوں ذری آڑ کے کال کروں گی۔

اگے چلن لگیں تے فاخرہ نے عابدہ ناں پچھیو یوہ کون ہے اس نے دسیو میرو مسیر ہے راشدہ نے کہیو اس تو پردو کریا کر یو غلط طریقو ہے عابدہ کہن لگی یو فون اسی نے لے کے دتو ہے ہوں روز گل نہ کروں تے سکون نیھ آتو فر میری مرضی جس نال گل کروں میرو جسم میرے مرضی ویہ سمجھان لگیں کہ مزو تاں ہے جسے جسم میرو تے مرضی اللہ تعالیٰ کی عابدہ بولی چھوڑو مولویاں آلی گل خیر فرتاں ٹرتاں عابدہ کہن لگی سوہنی جا ہےسیلفی ہو جائے فاخرہ تے راشہ نے کہیو نہ اسلام مانھ تصویر کڈہنی حرام ہے عابدہ ہسی تے اپنی سیلفی بنائیں اور دوئے بہن حیران مڑ کےرات کہر آ گئیں رات لیٹ حسن وی کہر مڑیو جد سارا، تائیر چچیر مل کے بیٹھا تے قاسم تے اس کی بہن حیران کہ ان دواں بہن پہائیاں کولے مہنگا موبائل ہیں انہاں نے سمجھان کی کوشش کی پر ویہ نہ منیا کہ جدید دور جدید ٹیکنالوجی تو فائدو لینو چائیے فر انسان مرضی کو مالک تنگ نظر نیھ ھونو چائیے عید تو بعد کرم دین ہور مڑ کے شہر اگیا ایک تہیاڑے عاتکہ فون لے کے آئی کے دو تہیآڑاں تو کوئی کال کرے کہ راشدہ نال گل کرنی ہے کرم دین نے فون سنیو پچھیو کون ہے کیوں گل کرے راشدہ نال اس نے دسیو کہ عابدہ میری مسیر ہے اس کے نال تھی راشدہ عید آلے دن ملاقات ہوئی تھی تاں سوچیو کہ دعا سلام کر لیوں کرم دین نے سمجھایو راشدہ کول موبائل نیھ اور یو جائز وی نیھ اس واسطے کال نہ کریئے نوں اپنی چاچی یا میرے نال گل کرنی ہوئے تے بے شک کال کر ہاں قاسم کو یو نمبر ہے اس نال گپ لایا کر خیر وقت گزر تو رہیو کرم دین پولیس تو ریٹائر ہو گیو اس کی دوئے بچیں عالمہ بن گئیں بچو مولوی بن گیو اور ایک مسجد مانھ خطیب لگ گیو جبکہ شرفو بھی ریٹائر ہو گیو اس کو بچو بارھویں تک پڑہیو تے نال اپنی گڈی لے کے چلان لگ گیو بچی نے ایم اے تک پڑہیو کجھ عرصہ تو بعد شرف دین شہر آیو تے کرم دین نال گل کی کہ ہون بچیاں کا رشتاں کے بارے سوچاں تے کرم دین نے پچھیو کے کرنو چاہوے تے اس نے کہیو کہ فاخرہ کو رشتو حسن واسطے تے عابدہ قاسم واسطے کرم دین نے کہیو بچہ مڑ کے آویں تے انہاں تو پچھ لیاں اگر ویہ گزارو کر سکیں تے ٹھیک ہے شرفو کہن لگو میرا بچاں کو ہوں ذمہ دار ہاں پچھن کی لوڑ نیھ مناں یقین ہے میرا بچہ میری گل نیھ ٹوکتا کرمو نےکہیو کہ ذمہ دار ہوں وی ہاں مگر شرعی لحاظ نال پچھنو ضروری ہے جد کرم دین نے پچھیو تے دوئے بچہ سر جہکاکےکہن لگا ابو جی جس طرح تم مناسب سمجھیں جبکہ شرفو نے پچھیو تے عابدہ کہن لگی ہوں نیھ کرتی مولوی نال بیاہ اس نے سمجھایو پر اس نے صاف دسیو ہوں اپنا مسیر عاصم نال بیاہ کروں گی حسن نا پچھیو تے اس نے کہیو کہ میری سکول کی کلاس فیلو ہے اس نال شادی کروں گو شرفو مچ پٹیو پر گل نہ بنی اور بچاں ور سختی کرن لگو تے بچی عاصم نال نکل گئی جا کے عدالت مانھ بیاہ کرلیو اور بچہ نے اپنی کلاس فیلو نال بیاہ کر کے الگ مکان مانھ رہن پے گیو شرفوتے شہینہ کہلا رہ کے پچھتاویں جبکہ کرم دین کی بڑی بچی راشدہ کو نکاح اپنا ماولیر شفیع نال ہو گیو اوہ سکول ٹیچر ہے تے مولوی قاسم کو نکاح ایک عالمہ نال ہو گیو تے فاخرہ کو نکاح اس کی پہرجائی کا پہائی نال ہو گیو اوہ وی قاری ہے اور بچیاں نے ملکے اپنا محلہ مانھ بچیاں کو مدرسو کھول لیو فر ایک تہیاڑے کرم دین نے عاتکہ نانھ کہیو چل کل گراں چلاں جد دوئے شرف دین کے کہر پہچیا تے شہینہ کپڑا تہوئے تھی اٹھ کے ملی گل لگ کے روئی تے کرم دین نے پچھیو شرف دین کت ہے کہن لگی روز صبح نکلے تے رات مڑ کے آوے خیر رات شرفو مڑیو تے داڑھی رکھی وی سر پر رومال دوئے پہائی ملیا نماز کو وقت ہو گیو کرم دین نماز پڑہن لگو تے شرف دین نے کہیو نماز مسجد مانھ پڑہاں گا کرم دین خوش، بھی ہویو تے نال حیران بھی مسجد گیا جماعت نال نماز پڑہی تے رات دکھی سکھی گل کرتا رہیا صبح فر مسجد گیا تے نماز تو بعد ایک آدمی نے اٹھ کے اعلان کیو جایو نہ شرف دین صاحب تہارےنال کجھ گل کریں گا شرف دین اٹھیو تے کہیو پہائیو ادب نال عرض کروں کہ اپنا بچاں نا سکول مانھ پڑہان کے بجائے مدرسہ مانھ پڑھایو ورنہ میرے نالوں پچھتاؤ گا ہن میرا بڑا پہائی تہارے نال کجھ گل کریں گا کرم دین اٹھیو تے کہن لگو مناں تم سارا بزرگ جانیں یوں اپنو پریوار شہر لے گیو تھو میں بچہ مدرسہ مانھ داخل کیا تے سارا میرے مخالف ہو گیا تھا پر میں کسے کی نہ سنی اج میری بڑی بچی عالمہ ہے نال پی ایچ ڈی کی ہے مدرسہ کی مہتمم ہے دوجی بچی قاریہ ہے نال ایم اے کیو ہے اور بچو عالم دین ہے شہر کی بڑی مسجد مانھ خطیب ہے الحمد للہ بچاں کی شادیں بھی اپنی مرضی نال کیں اور ہوں خوش ہاں کہ میرا بچاں کی وجہ تو شہر کا لوک میری عزت کریں مناں اپنی زندگی اور فیصلاں پر کوئی پچھتاوو نیھ دوجی طرف شرف دین تہارے سامنے ہے ہم دوئے پہائی ایک سکول مانھ پڑہیا ایک ماں کو دودھ پیو لیکن ماحول نے شرف دین کی اکھاں پر پٹی بنھی تھی گراں یا شہر خراب نیھ ہوتو بلکہ ماحول انسان نا خراب یاٹھیک بناوے کوئی بچو خواہ اوہ مسلمان کے کہر پیدا ہوئے یاکافر کے کہر کافر پیدا نیھ ہوتو اس واسطے اپنی اولاد ناں دنیا کی تعلیم کے نال نال دین کی تعلیم دیو نہ تے شرف دین نالوں پچھتاؤ گا۔

جد کہر مڑیا چاہ شاہ پی تےکرم دین کا نمبر پر کال آئی قاسم گل کرے تھواس نے دسیو کہ مناں اللہ تعالیٰ نے پوت بیٹو دتو ہے کرم دین نے مبارک دتی عاتکہ عابدہ تے شرف دین نے مبارک دتی فر کرم دین ناں قاسم نے پچھیو ناں کے رکھوں کرم دین نے کہیو تو عالم ہے چنگو ناں دیکھ کے رکھ اس نے دسیو خضر علی اس پر کرم دین نے تعریف کی فون بند کر کے عاتکہ نا مبارک دتی تے نال ہس کے کہیوتیرا پوترا ناں سکول مانھ داخل کرواں گا اس پر سارا ھسیا تے گل مک گئی۔

نہ جا عقل کا فیصلہ ور عقل کی عیاری دیکھ، میاں محمد یوسف، گوجری شاعر

میاں محمد یوسف، گوجری شاعر

نہ جا عقل کا فیصلہ ور عقل کی عیاری دیکھ

نہ جا عقل کا فیصلہ ور عقل کی عیاری دیکھ

رب نال تعلق نبیاں کا عشق تے وفاداری دیکھ

ہمیشہ فیصلہ عشق کا ہی قبول ہوتا رہیا جے

تو اگلی پچھلی تاریخ نوئیں پرانی ساری دیکھ

عشق نے تے ہی بابا آدم نا صفی اللہ بنایو تھو

توبہ قبول ہوئی آدم کی عاجزی انکساری دیکھ

پہلو قتل انسانیت کو اولاد آدم نے ہی کیو تھو

 ہابیل تے کابیل کہلیا کابیل نا خنجر ماری دیکھ

عشق نال ماری چھال ابراہیم خلیل اللہ نے اگ مانھ

رب نے بچایو تھو خلیل کی فر پکی یاری دیکھ

چھری فیری اسمعیل ور عشق ربی ما خلیل نے

ورنہ تو شیطان کی ترواں نال مکاری دیکھ

بیابان جا ور  نکلیو زم زم کوپانی عشق نال

تو  ات حاجرہ کی صفا مروہ  ور بے قراری دیکھ

ہمیشہ سٹیں گا کھوہ مانھ اپنا سکا ہی یاد رکھ

ذری غور نال بردران یوسف کی رشتہ داری دیکھ

یوسف نا زلیخا کامکر تو عشق نے ہی بچایو

ورنہ تو زلیخا کی ذری چال تے تیاری دیکھ

صبر ایوب مشہور ہے ہور کائے مثال نیھ ملتی

کھول قران تے انکی لمی  درد ناک بیماری دیکھ

آیو جد طوفان نوح تے نہ بچیو کوئی مشرک

ہورناں نانھ چھوڑ سکا پوت کنعان کی غداری دیکھ

یونس نے ماری چھال پانی کے اندر عشق نال

مچھلی نا حکم ربی ملیو امانت ہے ہماری دیکھ

موسیٰ نال پالیو رب العالمین نے فرعون کے کہر مانھ

ھزار بچہ ماریا فرعون نے رب کی حکمت ساری دیکھ

 مچ روئی سیدہ مریم جد بشارت ملی عیسی کی

بولیا چہولی تو عیسی ہائے تو ماں کی پاسداری دیکھ

ملی جد سلیمان نا حکومت سب جہاناں کے اپر

مکہ سبا بلقیس کا تخت کی اچی اوڈاری دیکھ

آیو داؤد جس وقت آرا کے تلے رب کا عشق بچ

بچایو رب نے آرا کا دنداں کی ہوشیاری دیکھ

قران بھی میرا مصطفیٰ کومعجزو تے معراج بھی

فرش تو عرش میرا سوہنا نبی کی سواری دیکھ

منافق نانھ رب کد بخشے پیو دعا پیغمبر کرے

 ابن ابئی کی  نماز نہ دیکھ نبی نال غداری دیکھ

ساری ازواج میرا نبی کی ماں ہیں اس امت کی

نبی کا کہر مانھ صدیق کی لخت جگر کواری دیکھ

سردار جنت کا جواناں کا تے حسن و حسین ہیں

 سجدو کیو کربلا ما فر سر نہ چایو جانثاری دیکھ

سب شے قربان کی نبی اکرم کی محبت پر میاں

صدیق فاروق غنی حیدر صحابہ کی یاری دیکھ

میاں محمد یوسف

کسبگر الله کو دوست صرف ارام تے جننہ رکھ، گل ولی حسرت، گوجری شاعر

گل ولی حسرت، گوجری شاعر

 

کسبگر الله  کو دوست صرف ارام تے جننہ رکھ

سپک کمے کھانڑ حرام تو حرام تے جننہ رکھ

دوستی  منو ویو خو ایک عظیم تے اچو جزبو

خوچہ ھو جا کونڑ بدنام نو اس بدنام تے جننہ رکھ

کونڑ چہ گوجر کی جڑ کپے کونڑ چہ گوجری کی جڑ کپے

خیر کے ھوے وہ تیرو قام نو ایسا قام تے جننہ رکھ

نشو ھر اک ژوند تے جوانی کی تباہی لے

تو ساقی تے میخانہ تے بھریا جام تے جننہ رکھ

جن تے سیں جوڑ لے اپے کھاتے دوجہ پو کھوا

بے بس مونڈو گیدڑ نا جوڑ ایسا نام تے جننہ رکھ

یا خو ایک متل لے پہلے تول تے کاڈ بول

حسرت ھو جا اوخیار صرف الزام تے جننہ رکھ۔

گل ولی حسرت

بونیر سوات

اسو، آیو اسو تے رکھی میں آس دل مانہہ خبرے یار کو کوئے پیغام آوے، چوہدری حسن الدین حسن، گوجری شاعر

چوہدری حسن الدین حسن، گوجری شاعر

اسو

آیو اسو تے رکھی میں آس دل مانہہ خبرے یار کو کوئے پیغام آوے

مت پہل کے کرے وہ یاد سوہنو چھٹ بیس کے کرن کلام آوے

پہلوں کس رے نی ھوں پہل سکتو یاد سجناں کی صبح شام آوے

جس دل  مانہہ زخم ہزار حسن  اس دل نانہہ کد آرام آوے

چوہدری حسن الدین حسن

ہوں آں اک ٹٹانو بلتو، اپنی کالی رات ما خوش آں، رفیق شاہد، گوجری شاعر

رفیق شاہد، گوجری شاعر

گوجری غزل

ہوں آں اک ٹٹانو بلتو، اپنی کالی رات ما خوش آں

چڑھتا دینھ کے منہ نیں لگتو، بس اپنی اوقات ما خوش آں

کپڑاں وچوں باہر آ کے، بھانویں پیﺅ کھلیار کرے وہ

اپناں کپڑا، اپنو پنڈو، اپنی سادی ذات ما خوش آں

مار گرپڑی دُکھ آویں جد، غم کی کُہمن کہیری پے جائے

نیناں کا چھبکار ما خوش آں، ہوں تے اس برسات ما خوش آں

میری اپنی ماں بولی ہے، اور کِسے کا بول نہ بولوں

اپنی مٹی، اپنا رنگ ما، اپنی ہی گل بات ما خوش آں

ہستو دیکھ کے اُس نا شاہد، چہلیو بن کے ہستو رہیو

وہ کے جانے ہوں تے اُس کی، خوشیاں کی ہر ساعت ما خوش آں

رفیق شاہد

تو مت کہہ تھو،مناں چنگی، کائے شئے بے ڈھنگی نئیں لگتی، منیر احمد زاہد، گوجری شاعر

منیر احمد زاہد، گوجری شاعر

گوجری زبان کی پہلی منظوم  مکالماتی لوک کہانی۔

تو مت کہہ تھو،مناں چنگی، کائے شئے بے ڈھنگی نئیں لگتی

کھڑلی، چٹلی، کڑ، مدھانی،  مرگانی  چنگی  نئیں  لگتی

تو مت کہہ تھو ہچھا دودھ تیں مناں کجھ مشکان جئ آوے

تو مت کہہ تھو جمیا دودھ کی بو مناں بس کھان جئ  آوے

تو مت کہہ تھو سجری لسی تیں وی مناں باس جئ آوے

تو مت کہہ تھو روز ہی اماں ساگ کتر کے پہاس لیاوے

تو مت کہہ تھو دودھ رڑکن کی واز نے میرا کن کھا لیا

تو مت کہہ تھو بکری بھیڈاں نے ہیں جنگل بن کھا لیا

تو مت کہہ تھو کاہناں بوہلی مہیس تے پہٹی گاں ہیں رکھیں

کاہناں یہ چہوٹیں تے بیہڑیں نونہہ دھیاں کے ناں ہیں رکھیں

تو مت کہہ تھو کاہناں ادا نے یو سارو مال ہے رکھیو

دس گھوڑا، دو کچرا، کھوتا، چہوٹا کو وبال ہے رکھیو

کاہناں یو اک ساہیو کتو، کاہناں یہ بلیں ہیں پالیں

رتا ککڑ، چٹا ساہیا،سو تے اپر ککڑیں کالیں

دو جندرا دو چھابو دو ہل، کاہناں دو دو مج ہیں رکھیا؟

پھال تے منڈھی اوگ تے ہتھی ہل تے ایلی تج ہیں رکھیا

کاہناں چھے دانداں کی جوڑیں کاہناں یہ بیہڑا ہیں رکھیا؟

کاہناں یو سو بیہہ (100×20)کو اجڑ کتا یہ پہیڑا ہیں رکھیا؟

کاہناں یہ ڈھوکاں کا لاہنجا بہکاں کا کھہڑا ہیں رکھیا؟

سارو سال ٹرن ما لنگے بیسن دو تیہاڑا ہیں رکھیا!

کاہناں یا مکھن کی ڈولی ڈلہ کی کنڈی ہے رکھی؟

کاہناں یاہ مٹی کی ڈبی ،کاہناں  یاہ ہنڈی ہے رکھی؟

کاہناں بہتر ڈوگا ،بنجر کاہناں یہ ٹہنڈیں ہیں رکھیں؟

کاہناں ہوتر کاہناں چھیتر زمیں کجھ کنڈی ہیں رکھیں؟

کاہناں مک لڑیں تے ککرا کاہناں پسا، لادو، گھہاڑا؟

کاہناں کھنگا ،کھنگرا ٹانڈا، چہانٹھیں لکڑیں منڈھا پھاڑا؟

کاہناں جندر آٹو پیسں؟ کاہناں کہائی تے ہل باہی؟

کاہناں اوڈھ تے کوٹھا چھنڈن؟ سالو سال کی بلی بنہائی؟

کاہناں کوٹھا چھڑن کا وختا ہور تمسہوڑ کی برف سٹائی؟

باغاں کی گوڈی تے تالی موہڑہ تیں کپنی ہتھوائی؟

تو اکیو ان وختاں کولوں ست سمندر پار ہے نسیو!

تو میماں کا دیس ما جاکے گوراں چٹاں پاس ہے بسیو!

بستو رستو روہ رے بچیا، ور بسنو رسنو ہے اوکھو!

کرکے کھانی اس تیں اوکھی کد پردیس ہے اتنو سوکھو؟

چرخی چلتی رہی  جندر کی، رات دیہاڑی ہل مج پھریا

کج دانہ تے پیسن ہوا باقی دالو بن کے کریا

فیر اپنا کی یاد نے دل ما ارماناں کی دینھی بالی

اچیں بلڈنگ،سوہنیں صورت لگن پے گئیں مچ  بے حالیں

آئی یاد وطن کی ڈاہڈی فیر یاداں نے ہسڑ کہلیو

باہر کو شونکی دیس اپنا کی یاد ما ہویو مچ ہی چہلیو

ہن کج سالاں پچھے ماں نا چٹھی ما وہ یاہ گل لکھے!

اماں نکا پہائی نا کہیے اپنا دیس ما بسن سکھے!

ہوں دیسوں پردیس ما آکے،قسمیں اماں رل گیو ہاں!

کھان پین تے لان کا نخرا اک اک کرکے بھل گیو ہاں!

رات دیہاڑی کم کا ڈاہڈا چہکھڑ اگے چہل گیو ہاں

دیس اپنے انمول تھو ور ات کھوٹیں سکیں تل گیو ہاں

اماں ،ایفل ٹاور ٹاور کولوں چنگو ہے بس تنگ کو بوٹو!

لندن کا لشکاراں کولوں چنگی اپنی بانڈی کہوٹو

پیزا چکن تے برگر کولوں سکی روٹی ساگ ہے چنگو!

میرو گراں تے بس جنت ہے جت لوکاں کو بھاگ ہے چنگو

ہور کج سالاں پچھے شونکی پتر ہٹ کے، گھر مڑ آیو

چھوڑ کے جس دھرتی  نا نٹھو اس مٹی سنگ فر جڑ آیو

تنگ کے گل لگ کے مچ رنو، ماریا آن کلاوہ سب نا

لوک یو سمجھیں شائد وہ نئیں  خبرے لگا بھلاوہ سب نا

بلئیں باسیں رنو ،ماں تے باپ نا اپنے سینے لا کے

 کھوتا دانداں نا وی ملیو بانڈی اندر نظر بچا کے

چار پیار دتا ککڑی نا کہاہ کا گہاڑا پچھے جا کے

کج چر بیٹھو رہیو کتا کی ٹہاری ما چپھڑ ڈاھ گے

ساہیا سر کے اپر چایا،ککڑ چاہڑھ گنہاڑے رکھیا

اکھ  بکریں بھیڈاں ور رکھیں کن وی کیڑ ہساڑے رکھیا  

ماں نا کہن لگو اج اماں دودھ رڑکن کی واز سنوں گو

سکو بوٹو آپ کپوں گو تے کڑکن کی واز سنوں گو

اماں  لسی چٹنی دیے مک کی روٹی گھی ما  کٹ کے

 کتنا سالاں کو بھکو ہاں، جیتو رہیو ہاں، گھٹ گھٹ کے

آ لے رکھیے  نمکی چاہ کو بھریو  اک سماوار بناکے

کل کی رات ہوں رہوں گو اماں ادا نال ہی جندر جاکے

نہ پوچھ گڈیاں جہازاں کا وازاں تیں سوہنی واز جندر کی

ہن نئیں اپنے دیسوں جاتو یاہ ہے دل کی واز اندر کی

اپنوں دیس نری جنت ہے  یاہ گل رکھیے پلے بنھ کے

پیٹ دروں  ہوئے پہانویں پہکھو  چلیے سر تے سینو تن کے 

 مٹی کی خشبو نہ بھلیے یاہ عطراں دوں بدھ خشبو ہے

پرفیوماں نالوں لکھ چنگی جنگل، پہاڑاں کی خشبو ہے

ہم اسے مٹی دوں بنیا اس مٹی نے پردو ٹہکنو

ماں کی بکھی  رہنو اگے پچھے ہرگز نئیں بھٹکنو

جینو چار دیہاڑا زاہدؔ جت جمیو تھو اتے مریے

پہانویں ٹر پھر دنیا ساری آخری چھکی ڈیرے بھریے

منیر احمد زاہد

عشق کی بُوٹی مُشک کھنڈاوے ڈھکے کون چھپاوے کون، عبدالرشید چوہدری، گوجری شاعر

عبدالرشید چوہدری، گوجری شاعر

عشق کی بُوٹی مُشک کھنڈاوے ڈھکے کون چھپاوے کون

یاد سجن کی تن من ساڑے باہجھ ملاپ بُجھاوے کون

تتا تتا غم کا ہُولا دِل نا ساڑیں لُوسیں اج

عشق کے تتے ہاڑ مہینے ساون جھڑی لگاوے کون

غم کی کالی شاہ راتاں ماں یاد کو دیو بال رکھوں

ہولیں ہولیں چھپتاں لُکتاں میری کنی آوے کون

آس کی بیل نا کپ کترکے پھُلاں کی امید کروں

ہوں کیسو کم عقلو بندو یار مِناں سمجھاوے کون

واز میرا پیراں کو سُن کے بند کیو دروازو اُس

آس ترُٹی ہیکھی مُکی ہُن بوہو کھڑکاوے کون

سام لیا تھا دِل کا پھنگن  پھٹ  رشید  لُکایا تھا

چو گیا اکھوں چھم چھم اتھروں دِل کو بھیت لُکاوے کون

عبدالرشید چوہدری