لشکارِمحمدﷺ، عبدالرشید چوہدری

عبدالرشید چوہدری گوجری لکھاری

لشکارِمحمدﷺ،  عبدالرشید چوہدری

اپنا دین دھرم، دھرتی تے ماںبولی نال پیارانسان کی فطرت مانھ شامل ہے۔ انسان نا جہڑی گل اپنی ماں بولی نال سمجھ آئے وَہ کِسے سِکھی وی دُوجی زبان تیں نہیں آسکتی۔ماںبولی کی مِٹھی مِٹھی لوریںجہڑی مانواں نے بچاں نا اپنا دودھ کی دھاراں مانھ گھول کے پلائیںتے وَہ بولنائی جہڑی بچہ نے اپنی ماں تیں کلی زبان نال بولنی سِکھی اُس کی مِٹھاس بیان کرتاںواں اکھراں کی جھولی مُچ سوڑی پے جائے۔ جس طرح دنیاوی علوم ناسکھن سمجھن واسطے دنیا نے مادری زبان کی لوڑ نا من لیو ہے اِسے طرح دین سمجھن واسطے بھی مادری زبان کی لوڑ تیں مُکریو نہیں سکتو۔

  بدقسمتی نال مہارا ملک مانھ گوجری زبان نال ماتریری آلو برتاءکیوجا رہیوہے جس کی وجہ نال گوجرو کلچر، ادب تے زبان سخت خطرہ مانھ ہیں۔حکومتی عدم دلچسپی تے مہاری اجتماعی بے حسی کے باوجود کُجھ لوگ اپناداھروںماںبولی کا اکھر چُن چُن سے سام رہیا ہیں ان چونما نانواں مانھ مفتی ادریس ولی ہوراں کو ناں علم تے ادب کا اشمان پر لوءکا تارا ہاروں روشن دہسے۔           

گوجری زبان مانھ شاعری کو کھُروتے مُچ پہلاں لبھے پر اِس زبان مانھ نثرنگاری کی رِیت مُچ چِرکی پئی۔  جموں کشمیر کلچرایکڈیمی سرینگر، آزاد کشمیر ریڈیو تراڑکھل ، مظفرآباد تے مقبوضہ جموں کشمیر کا ریڈیو سٹیشناں کی وجہ تیں گوجری نثرکو لوڑ پئی تے پھر اس کو رواج پیو۔ اِسے دور مانھ گوجری زبان مانھ افسانہ ڈرامہ تے فیچربھی لکھیا جان لگا تے قرآن پاک کو ترجموبھی ہوو ۔ مولانا ڈاکٹر نورمحمدبھدرواہی(مرحوم) کی سوہنو قصو ( سورة یوسف تفسیر)تے پروفیسرافضل جوہرہوراں کی کتاب بھی نثری سلسلہ کی اک اہم کڑی ثابت ہوئیں۔ہُن مفتی ادریس ولی ہوراں نے نبی پاک کی سیرت طیبہ بارے لشکارِمحمد لکھ کے گوجری زبان کا نثرنگاری مانھ چوکھو باہدو کردِتوہے۔

گوجری زبان کو اپنو رسم الخط نہ ہون کی وجہ نال اس زبان نا لکھن کی اوکھت اپنی جگہ ہیں   باقی زباناں کی طرح گوجری زبان مانھ بھی مختلف لہجہ ہیں جہڑا اس زبان کو سوہنپ ہیں۔ مہاری یہ مجبوری ہے جے ہم عربی رسم الخط مانھ ہُوبہو گوجری نیں لکھ سکتا ۔ لہذا کوشش یاہی ہونی چاہئے جے پنجابی کی طرح اردو کے نیڑے نیٹرے رہ کے لکھیو جائے تانجے لکھی وی تحریرسٹ پسٹاں تے بے سوادو کئے بغیر، گھٹ تیں گھٹ اوکھت نال پڑھی جا سکے۔

لشکارِمحمدکا مطالعہ تیں پتوچلے کہ مفتی ادریس ولی ہوراں کی نثرنگاری پر باٹی پکڑ ہے۔تحریرکی لذت، بھُلیابِسریا وا اکھراں کا خوبصورتی تے احتیاط نال استعمال تے عبارت کا تسلسل تیں پڑھن کو سواد چوکھوہو جائے۔اس کتاب کا مطالعہ تیں یہ گل بھی باندے آئی ہے کہ مفتی ادریس ولی ہورسرکارِدوعالم کی زندگی کی اُن گُٹھاں نا باندے رکھ کے لکھ رہیا ہیں جن کا لشکاراں نے ساری دنیا نا روشن کیوتھو۔مفتی ہوراں کی تحریرمانھ فرقہ واریت،عدمِ برداشت تے ٹک پَچھ لاتی کائی گل نہیں۔لشکارِمحمد کا مطالحہ تیں یاہ گل بھی باندے آئی ہے جے مفتی ادریس ولی ہوراں کی سرکارِ دوعالمﷺ کی زندگی مبارک پر مُچ ڈوہنگی نظر ہے۔مفتی ہوراں نے آپﷺکی زندگی کا عملی نمونہ صبر، برداشت ، تعمل ، رواداری، دشمناںنا معاف کرنو، بدلو نہ لین جیسا ہِیرا موتی چُن چُن کے مہارے باندے رکھیا ہیں جے ہم یہ ہی نگینہ لا کے اپنی اپنی زندگی چمکا لہیاں۔ بدلہ کو چاءتے دُوجاں کا عیب ٹٹولن کی عادت اک بڑی انسانی کمزوری تے یاہی فساد کی جڑ ہے۔ کدے ہم سیرت پاک کی چھاں ہیٹھ بیس کے دُوجاں نا معاف کرن کی اٹکل سِکھ لہیاں تے لوکاں کا پِچھوکنڈ عیب پھلورنا چھوڑ دہیاں تے مہارو معاشرو تے آخرت سُدھر سکے۔مفتی ادریس ولی ہوراں نے نبی پاکﷺ کی اِن ہی مبارک عادتاں داھر مہاری توجہ موڑی ہے۔ فرقہ واریت کی بیماری کی وجہ نال زباناں تیں لم تے تحریراں تیں زہرکڈھن آلاں نا مفتی ادریس ولی ہوراں نے روشن رستو دس چھوڑیو ہے ۔مفتی ہوراں نے یہ جاچ بھی دسی ہے کہ دین کی زرخیزباڑیاںمانھ جھل کنڈاں کی فصلاں کی بجائے پیار محبت تے اخوت کی ہل باہی بھی کی جاسکے ۔ مفتی ادریس ولی ہوراں نے لشکارِمحمد مانھ عرب کی تہذیب تمدن تے  عرب اقوام کی تاریخ نا بھی شامل کیوہے جس تیںعام آدمی کا علم مانھ باہدو ہوئے گو۔

عالمِ اسلام کاموجودہ حالات نا دیکھتاں واں اسراں لگے جے ہُن وُہ ویلو پہنچ آیو ہے جس کابارے آپﷺنے دسیوتھو جے میری اُمت پر اک ایسو ویلو آئے گوجدمسلماناں پرکافر اس طرح ٹُٹ پوویں گا جس طرح بھُکھا روٹی پر ۔اج اُمت مسلمہ پر اتنی بڑی مصیبت آئی وی ہے جہڑی اس تیں پہلاں کدے بھی نیں آئی تھی۔ اس بلاءکو مقابلو کرن واسطے ضروری تھوکہ ہم سارا مسلمان اللہ پاک کی مرضی موجب اکٹھا ہوکے اُس کی رسی نا پکڑ لیتاتے بکھو بکھ نہ ہوتا۔مگربدقسمتی نال ہم ساراں نے رل مل کے اللہ کی رسی نا ادھریڑ چھوڑیو ہے تے اپنی اپنی لڑ پکڑ کے چھک رہیاہیں۔کئی کئی فرقاں مانھ بنڈیاوامسلماناں کے درمیان نفرت ، تعصب تے تنگ نظری کا ہمالیہ تے اُچا پہاڑ کھلا ہیں جد کہ ان کا مقابلہ مانھ عالم کفر متحد، منظم تے یک سو ہے۔اس دور کی یاہی ضرورت ہے کہ علماءتے دانشور اُمت ِ مسلمہ کا مفاد کی خاطر فرقہ واریت کے خلاف سانجھی کوشش کریں ۔ اس کوشش کی بوہنڑی کدے گوجری زبان نال ہوئی تے یہ مہاری خوش قسمتی ہووے گی۔ میراخیال مانھ مفتی ادریس ولی ہوراں کی لکھی وی لشکارِمحمدﷺ وطنِ عزیز کا علماءکی توجہ اس پاسے بھی موڑے گی تے لشکارِ محمد کا لشکارتیںجہالت، تنگ نظری، خودغرضی، فرقہ پرستی نسلی تے لسانی تعصب کی شاہ کالی رات روشن ہوجائے گی۔

لشکارِمحمدکا مطالعہ تیں اِسراںلگے کہ مفتی ادریس ولی ہوراں نے سرکارِ دوعالمﷺکی سیرت طیبہ کو بڑی ڈوہنگی نظرنال مطالعوکِیوہے تے یہ کوشش کی ہے کہ سیرتِ طیبہ کی لوء مانھ اندھیراںمانھ ڈابوںدیتاںکا رستہ روشن کیاجائیں۔ہُن عالمِ اسلام کا علماءتے دانشوراں نا مومن کی بصیرت نال عالمِ اسلام کی راہنمائی کرنی ہے تانجے ماضی مانھ دینِ اسلام کا پِنڈا اُپر فرقہ واریت تے عدمِ برداشت کا جہڑا جہڑا پَچھ یہودونصاریٰ کی proxies لڑن کی وجہ تیں لگا تھا وِہ مول جائیںگا۔اج کا مسلمان کو کردارتے اللہ پاک نا مطلوب مسلمان کی تعریف کوئی جوڑ نہیں کھاتی ۔ ماضی قریب مانھ مہارا ہتھوں اس دھرتی کا سینہ پر جہڑا جہڑا داغ دھبالگااُس کی چھنڑک اسلام کا خوبصورت چہرا پر بھی پئیں۔ اِسے وجہ تیں اج اکسفورڈ کی ڈکشنری مانھ اسلامو فوبیاکی اصطلاح شامل ہوچکی ہے جس کو مطلب اسلام کو خوف ہے گویا کہ اسلام خوف تے ڈرا آلو مذہب ہے۔ اسلام بارے اس غلط تاثر نا ٹھیک کرنوبھی علماءتے دانشوراں کی ذمہ داری ہے۔اِس دور کو سب تیں بڑو تقاضو یوہی ہے جے اہل علم کا قلم تے زبان اس اُمت نا پھر تیں ملتِ واحدہ بنان کی خاطر لگ جائیں تے سیرت پاک کی لوءمانھ مسلماناں کی کردار سازی کریں۔اج مہاری اپنی کوتاہیاں کی وجہ نال دین اسلام کا چن ہاروںچمکتا چہرہ پر جہڑا داغ دھبہ پے گیا ہیں اُنہاں نا اپنا عمل تے کردار کی لوءنال صاف کرن کی ضرورت ہے۔جہڑو کم مہاراعمل نال خراب ہوو ہے وہ تبلیغ نال نہیں بلکہ عمل نال ہی سِدھو ہوسکے۔لشکارِمحمد کی لوءمانھ اج کا مسلمان نا اپناکردار نا قرآن تے سُنت نال جوڑ کھاتو بنان کی لوڑ ہے۔

مفتی ادریس ولی ہوراں نے لشکارِمحمدنال اپنی قوم نا بنی پاک ﷺ کی سیرت کی لوءدین کی کوشش کی ہے۔ہُن ہمناں اِسے لوءمانھ اپنا کردار کی تعمیر کی لوڑ ہے۔ کیونجے اج character building (کردارسازی) کو دور ہے تے کردار کُشی کا دہیاڑا لنگھ گیا ہیں۔ میری دعاہے کہ اللہ پاک مفتی ہوراںکو ناں تے چہرو دوہاںجہاناں مانھ روشن رکھے(آمین)۔میرو خیال ہے کہ انسان کا چہرہ پر نور اس کا اپنا اندرکی خوبصورتی کو عکس ہوئے۔کدے کوئی اندروں روشن ہے تے اس کو چہرومہروبھی لاٹ مارے تے اسے طرح اندرکی کالکھ بھی چہرہ پر آکے کھِنڈجائے۔مفتی ادریس ولی ہوراں کو چہرومہرو بھی یہ گل دس رہیو ہے کہ وِہ اندروں روشن ہیں۔مناں امیدہے کہ یہ روشنی ویلے کے نال نال ہورلشکے گی تے وِہ اپنی تحریراں تے تقریراں کے ذریعے عالمِ اسلام کی یکجہتی، معاشرتی بگاڑ تے عدمِ برداشت کے خلاف جہدی کرتا رہنگا۔

وماعلینا الالبلاغ